DILI, 30 janeiru 2024 (TATOLI) – Diretór Servisu Munisipál Agua Saneamentu no Ambiente Autoridade Munisípiu Dili, Herminio Moniz Ribeiro, dehan ekipamentu modernu hirak ne’ebé atu uza hodi rezolve problema lixu, sei inspesiona iha tempu badak ‘’em breve’’ ka iha fevereiru nia-laran.
“Ita-nia ekipamentu pezadu sira-ne’e balun sei iha dalan, sei to’o iha fulan fevereiru hafoin ita sei halo inspensaun ba ekipamentu no mós ita sei iha serimónia tradisionál timor-nian, hafoin Governu bele entrega fali ba Empreza China Harbour ho empreza lokál PAX hodi hala’o servisu sira-ne’e”, Herminio dehan iha nia kna’ar fatin Matadoru, ohin.
Nia rekorda, empreza ne’ebé sai vensedór hodi sosa ekipamentu mak China Nuclear CN22. Ekipamentu hirak ne’e mak kolesaun no transportasaun raut lixu no mós fatin lixu nian ne’ebé mak ho medida oioin.
“Ekipamentu agora daudaun ne’e mak ekipamentu kolesaun no transportasaun raut lixu nian, depois fatin lixu ne’e rasik ho nia medida oioin depois ekipamentu pezadu sira hanesan pundoxa ho eksa. Ida-ne’e atu utiliza hodi halo servisu iha Tibar no mós ekipamentu ba roda tolu nian ne’ebé mak sei utiliza hodi tama sai bairo sira iha Dili”, nia informa.
Nia relata, ekipamentu roda tolu sira ne’e hamutuk 10, fatin lixu ho totál rihun ida, kompostu husi 1.1 litru 2.4 litru depois 1.1 metru kúbiku, 8 metru kúbiku no 20 metru kúbiku.
“Ekipamentu hirka ne’e ita sei halo inspensaun liuhosi atividade tradisaun. Hafoin mak enterga ba empreza hodi instala ba fatin lixu. Servisu ne’e responsabiliza hosi Empreza Xina Harbour no Empreza PAX”, nai subliña.
Nia haktuir, Prezidente Autoridade Munisípiu Dili, atualmente, sei halo diskusaun ho entidade sira kona-ba aplikasaun taxa bazeia ba Dekretu Lei númeru 2/2017 kona-ba rezidu sólidu urbanu.
“Ita iha hela faze diskusaun atu aplika taxa lixu nian, tanba ita sei haree Dekretu Lei númeru 2/2017 kona-ba lizidu sólidu urbanu, depois nia mekanizmu aplikasaun taxa ne’e oinsá, entaun pontu sira ne’e ita sei koleta husi taxa mak foin halo kordenasaun ho parte EDTL, tanba atu koleta taxa ne’e mai husi eletrisidade”, nia hateten.
Nia afirma, Autoridade Munisipál sei halo sosializasaun ba komunidade sira iha tempu badak kona-ba n utilizasaun ba fatin lixu modernu ne’ebé mak iha.
“Antes ne’e ami halo ona sosialiazasaun ba komunidade, maibé ami sei kontinua fila fali iha tempu badak, atu nune’e oinsá utilizasaun ba fatin lixu modernu ne’e ho di’ak”, nia konklui.
Notísia relevante : Problema lixu iha kapitál sei rezolve ho ekipamentu modernu
Jornalista : Felicidade Ximenes
Editór : Zezito Silva
