iklan

HEADLINE, KAPITÁL

Problema lixu iha kapitál sei rezolve ho ekipamentu modernu

Problema lixu iha kapitál sei rezolve ho ekipamentu modernu

Prezidente Autoridade Munisípiu Dili, Guilhermina Filomena Saldanha. Imajen Tatoli/Francisco Sony

DILI, 22 Janeiru 2024 (TATOLI) – Prezidente Autoridade Munisípiu Dili, Guilhermina Saldanha, hateten problema lixu iha kapitál Dili sei rezolve ho ekipamentu foun modernu sira.

“Governu sosa ona kontentór no ekipamentu sira seluk atu halibur lixu iha kapitál ho orsamentu millaun $7.4  atu rezolve problema lixu iha ita-nia rain”, Guilhermina dehan iha nia kna’ar fatin Matadoru ohin.

Prezidente AMD informa, Governu sosa ona kontentór foun sira ho tipu oioin hanesan 200 unidade ho metru kúbiku ida, 131 ho metru kúbiku ualu no 14 ho metru 20, 8m3 kompatór lixu ba kompromisaun karreta lixu ho unidade haat, kompatór 13m3 kompatór lixu komprimisaun karreta lixu ho unidade neen, kompatór lixu 20m3 karreta fo’er ho unidade neen, karreta lixu sanulu-resin-rua, karreta lixu ba kontentór rua, karreta tanke bee no mákina lixu rua.

“Iha 2018, ami asina kontratu ho kompañia China Harbor atu sosa ekipamentu foun no kontentór sira iha nasaun Xina”, nia afirma.

Nia esplika, semana kotuk ekipamentu sira-ne’e lori ba portu Tibar no sasan balun sei iha hela dalan atu mai tan iha loron 24.

“Ami sei kolabora ho Konsellu Administrasaun Fundu Infraestrutura (KAFI) hodi estabelese espesifikasaun ekipamentu sira ne’e no sei hahú nia funsaun iha fulan abril oin mai”, nia adianta.

Nia salienta, ekipamentu foun modernu sira-ne’e, sei rezolve problema lixu iha kapitál Dili. Maske nune’e, AMD kontinua ezije populasaun atu uza lixu tuir tempu ne’ebé estabelese ona entre tuku 12:00 no tuku 06:00 OTL.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!