BOBONARO, 01 feevreiru 2024 (TATOLI) – Animal komposta hosi asu, busa no lekirauk hamutuk 2,374 iha postu administrativu Maliana, munisípiu Bobonaro simu ona vasina antirrábika hosi Ministériu Agrikultura, Pekuária, Peska no Floresta hodi prevene animal hosi moras raiva ka asu bulak labele fó impaktu ba ema-nia saúde.
Notísia relevante: Governu lansa vasinasaun animal prevene Raiva iha Bobonaro
“Ami iha Maliana suku hitu ne’e sira halo vasinasaun ba asu 2,252, busa 111, lekirauk 11,” Xefe Departamentu Veterinária hosi Diresaun Servisu Munisipál Agruikultura Bobonaro, Eugénio Borges, informa ba jornalista sira iha Maliana, kuarta ne’e.
Eugénio Borges subliña, dadus refere rekolla hafoin ekipa vasinadór halo atividade vasinasaun tama sai uma iha suku hitu ne’ebé pertense ba postu administrativu Maliana inklui postu vasinasaun iha edifísiu Servisu Munisipál Agrikultura.
Nia dehan, programa refere hahú implementa uluk iha Maliana no postu administrativu Lolotoe konklui ona, maibé ekipa seidauk relata dadus totál animal iha suku tolu hanesan Gildapil, Lebos no Lontas.
Reponsável Departamentu Veterinaria Munisípiu Bobonaro ne’e, hatutan dezde implementasaun programa refere, iha postu administrativu la’o ho di’ak no iha Maliana mak animal na’in ladún koopera ho ekipa vasinadór sira.
“Ita atu ajuda ho vasinadór sira atu kaer asu ne’e mak difisil oituan, sira balun lakohi kaer nia asu hodi vasina,” nia hateten.
Nia hatutan, ekipa hala’o fali vasinasaun iha postu administrativu Balibo kobre suku sira hanesan Batugade, Sanirin, Cowa, Balibo Vila, Leolima no Leohitu.
Nia husu ba animál na’in sira atu koopera di’ak ho ekipa vasinadór sira atubele luta hamutuk prevene moras refere labale transmite mai munisípiu Bobonaro.
Ekipa vasinadór ne’ebé destaka iha munisípiu Bobonaro hamutuk 24 ne’ebé sei halo vasinasaun kobre postu no suku sira-ne’ebé besik kedas iha liña fronetira.
Notísia relevante: Governu Austrália apoiu vasina raiva animál hamutuk doze rihun 200 ba MAPPF
Jornalista: Sérgio da Cruz
Editór: Evaristo Soares Martins
