Assalam-SLB prontu kompete LVTL époka 2024

DILI, 01 fevereiru 2024 (TATOLI) – Prezidente klube primeira divizaun Liga Voleiból Timor-Leste (LVTL) Assalam no AD SLB Laulara prontu no preparadu kompete iha liga voleiból iha époka 2024.

“Ami preparadu no prontu hela ba Liga Voleiból nian, ami agora hein hela karik Federasaun Voleiból Timor-Leste (LVTL) fó sai ona orariu ba jogu ami prontu atu kompete,” hatete Prezidente klube Assalam Ipolito Soares ba Agência TATOLI iha Kampung Alor Dili, kinta ne’e.

Dadaun ne’e Assalam halo ona kontaktu ho jogadór na’in haat hosi Indonézia nune’e bele reforsa klube ne’e atu sai kampiaun iha tinan ida ne’e.

“Ita kontaktu ona jogadór hosi Indonézia, maibé ita sei haree lai bainhira orariu sai ona ami bele lori ami nia jogadór internasionál sira mai ona,” hatete Ipolito.

Iha sorin seluk, Sekretariu Jerál klube SLB Domingos Caero hatete, prontu kualker eventu no preparadu atu tuir LVTL époka ida ne’e.

“SLB preparadu hela, ami ne’e kualker tempu de’it, ha’u orienta ona ba jerente klube tantu futeból, basketból no voleiból kada semana tenke halo treinamentu atu nune’e orariu jogu federasaun sira fó sai ami ne’e preparadu ona,” hatete Domingos.

Tinan ida ne’e, Governu liu hosi Ministeriu Juventude Desportu Arte no Kultura (MJDAK) tau ona orsamentu atu apoiu ba liga Voleból hamutuk $70.000.

Jornalista: Hortencio Sanchez

Editór       : Florencio Miranda Ximenes