DILI, 01 fevereiru 2024 (TATOLI)—Ekipa téknika hosi operadór telekomunikasaun konsege hadi’a ona fiu balun ne’ebé durante ne’e iha Eletricidade de Timor-Leste, Empreza Públika (EDTL, E.P) nia ai-rin.
“EDTL realiza enkontru ho operadór telekomunikasaun sira ne’e ba dala-haat ona, enkontru ikus iha dezembru 2023, iha ne’e ami haruka karta ba sira hodi fó hanoin atu hadi’a fiu ne’ebé dada ladun di’ak no ita haree sabraut loos. Bainhira ami bolu sira no haruka karta, entaun sira hahú hadi’a, iha parte ida sira husu aumenta tempu tanba fiu sira ne’e dada no instala barak tebes ba ai-rin EDTL nian, ne’ebé ami autoriza hodi sira bele kontinua sira-nia serbisu,” Komisáriu Ezekutivu Servisu Korporativu EDTL, E.P, Júlio Gonçalves, informa ba Agência Tatoli, iha ninia knaar fatin, Caicoli, kinta ne’e.
Antes ne’e, públiku kestiona beibeik tanba fiu ne’ebé la organizadu espallu iha estrada públiku bele lori risku.
EDTL, E.P iha loron hirak liubá konvoka fali enkontru ida ho ekipa responsável hosi operadór telekomunikasaun hodi fó hanoin katak bainhira la aselera maka sei foti asaun liuhosi kontratu hodi aluga ai-rin, nune’e fiu desorganizadu EDTL maka sei hadi’a. Iha sorin seluk lei la autoriza atu operadór telekomunikasaun sira harii rasik sira-nia ai-rin.
“Ekipa dadaun haree hela kontratu ne’e depois lori ba sira haree, nune’e ami fó tempu ba sira semana ida depois ami realiza filafali enkontru ne’e hodi deside kustu aluger, ami labele mensiona lai montante tanba entre ami ho operadór sira mak hatene,” nia akresenta.
Notísia relevante: EDTL, E.P sei tesi kotu fiu hosi operadór telekomunikasaun ne’ebé dezorganizadu
Durante ne’e, operadór telekomunikasaun utiliza poste EDTL nian ho gratuita, maibé dadaun ne’e EDTL husu ona atu organiza, bainhira la kumpre desizaun ne’e maka sei estabelese kontratu ida hodi operadór sira ne’e aluga ai-rin hirak ne’e, nune’e hatama reseita ba kofre Estadu.
“EDTL fó tempu ba na’in ba operadór sira hodi haree didi’ak kontratu ne’ebé sei fó, bainhira konkorda bele asina kuandu la konkorda bele fó razaun, entaun parte rua tenke akumula buat hotu tuir dalan hodi nune’e labele implika ba hotu-hotu. Entretantu, poste EDTL iha Dili kuaze 500,” nia akresenta.
Iha loron14 dezembru, Komisáriu Ezekutivu Servisu Korporativu, EDTL, E.P, Júlio Jesus Gonçalves, liubá, hala’o enkontru ho Ministériu Obra Públika, Sekretariu Estadu bá Asuntu Toponómia no Organizasaun Urbana, Autoridade Reguladora Telekomunikasaun Autoridade Munisipál, TIC Timor inklui operadór telekomunisaun nasionál (Timor Telecom, Telkomsel no Telemor), Metrolink, Sacomtel, Global Net, Ralph Vision, Polísia Nasionál Timor-Leste (PNTL), Programa Nasionál Dezenvolvimentu Suku (PNDS) hodi atualiza informasaun no diskute arrendamentu aluga poste eletrisidade ne’ebé dada kabu fibra ótika.
Jornalista : Antónia Gusmão
Editora : Julia Chatarina
