iklan

DESPORTU, DILI, HEADLINE

Malázia apoiu FSTL konstrui kampu Sepaktakraw

Malázia apoiu FSTL konstrui kampu Sepaktakraw

DILI, 06 fevereiru 2024 (TATOLI) – Governu Malázia liuhosi nia Embaixada iha Timor-Leste apoiu Federasaun Sepaktakraw Timor-Leste (FSTL) hodi konstrui kampu ba jogu sepaktakraw hodi fasilita atleta sira bele treinu no halo jogu.

Embaixadór Malázia iha Timor-Leste, Amarjit Sarjit Singh, hateten, apoiu ne’e inisiativa Governu Malázia nian atu nune’e bele dezenvolve FSTL iha nasaun ne’e.

“Ami apoiu tanba jogu Sepaktakraw hanesan jogu ida identiku iha Malázia no jogu ne’e hala’o kada tinan iha SEA Games, entaun Timor-Leste iha mós federasaun ba jogu ne’e mak ami apoiu halo kampu ida ba sira atu fasilita sira bele ba tuir mós kompetisaun SEA Games,” hatete Embaixadór ne’e ba jornalista sira iha Otél Timor Loadge Dili, tersa ne’e.

Diplomata ne’e espera kampu ne’ebé halo ho espesifiku ho padraun internasionál ba jogu Sepaktakraw bele fasilita ona atleta sira iha Timor-Leste hodi dezenvolve liután sira nia talentu.

“La presiza koalia sai nia totál orsamentu ba konstrusaun ne’e tanba importante mak kampu ne’e di’ak ona no espera bele fasilita atleta Timor-oan”, katak

Kampu ne’ebé konstrui hosi Embaixada Malázia iha resintu Hotel Timor Loagde Dili

Governu agradese

Ho apoia ne’e, Governu Timor-Leste liu hosi Diretór Jerál Desportu Ministériu Juventude Desportu Arte no Kultura (MJDAK), João Rodrigues agradese ba Malázia bele apoiu  konstrui ona kampu ne’e ba FSTL.

“Ita agradese ba Embaixada Malázia ho vontade di’ak bele kontrui kampu ida ba Federasaun Sepaktakraw, ida ne’e faze ida hosi kooperasaun bilaterál entre nasaun rua nian iha área desportu nian,” hatete João.

Ho kampu ne’ebé ho patraun internasionál, nia afirma bele fasilita ona jogadór Sepaktakraw sira atu tuir formasaun kada loron, nune’e bele prepara ba eventu SEA Games tanba jogu ne’e identiku mós iha nasaun sira iha ASEAN.

Entertantu, Prezidente FSTL, José Caetano Guterres, hateten  kondisaun no fasilidade iha ona ba oin federasaun ko’alia ona ho Malázia atu tulun tan treinadór na’in-rua, nune’e bele fó formasaun ba treinadór timoroan sira atu iha koñesimentu di’ak liu ba jogu ne’e.

“Ba oin ita sei ko’alia tan ho Malázia atu apoiu tan treinadór na’in rua nune’e atu mai fó formasaun ba treinadór timoroan sira nune’e bele fó treinamentu di’ak ba jogadór sira,” hatete Prezidente ne’e.

Daudaun ne’e, treinadór timoroan na’in rua ne’ebé nu’udar mós dosente iha Universidade Nasionál Timor-Lorosa’e (UNTL) iha área desportu no atleta ativu hamutuk 20-resin maioria estudante iha UNTL.

Nune’e, iha tempu besik federasaun sei konvoka mós asembleia jerál hodi hili fali estrutura foun nune’e bele estabelese mós asosiasaun no klube iha munisípiu 14 iha territóriu nasionál.

FSTL hetan ona nia legalidade iha Notariadu hanesan federsaun desportiva hodi hamahan aan iha Konfederasaun Desportiva Timor-Leste (CDTL-sigla portugés) iha tinan 2018.

Jornalista: Hortencio Sanchez

Editór : Florencio Miranda Ximenes

iklan
iklan

Leave a Reply

iklan
error: Content is protected !!