iklan

JUSTISA, HEADLINE

Provedoria investiga múltipla kazu no PNTL rekoñese

Provedoria investiga múltipla kazu no PNTL rekoñese

Provedór Direitus Humanu no Justisa (PDHJ), Virgílio da Silva Guterres 'Lamukan’ halo lansamentu publikasaun no entrega relatóriu finál investigasaun, iha salaun biblioteka PDHJ, tersa (06/02/2024). Imajen Tatoli/Egas Cristóvão

DILI, 06 fevereiru 2024 (TATOLI) – Prevedór Direitus Umanus no Justisa (PDHJ), Virgílio Guterres, dehan provedoria lansa ona relatóriu investigasaun finál 2023 nian. Investigasaun ne’e destinada ba Polísia Nasionál Timor-Leste, Ministériu Agrikultura Peskas Pekuaria no Floresta, Ministériu Solidaridade Sosiál, Ministériu Edukasaun, Ministériu Finansas, Ministériu Interiór no Ministériu Administrasaun Estatál.

“Ohin Prevedór Direitus Humanus Justisa lansa ba públiku kona-ba relatóriu investigasaun finál durante 2023. Hosi relatóriu ne’e, PDHJ investiga kazu hamutuk 79. hosi kazu hirak ne’e kompostu hosi kazu violasaun direitus umanus, boa governasaun, ofensa integridade fízika no má administrasaun”, Virgílio Guterres hateten ba jornalista sira hafoin lansa ba públiku kona-ba relatóriu investigasaun finál PDHJ 2023 ne’ebé hala’o iha edifísiu PDHJ, Caicoli, tersa ne’e.

Virgílio esplika, hosi kazu violasaun direitu umanus ne’e barak liu envolve hosi membru PNTL sira liuliu kazu sira hanesan membru polísia tiru joven iha Viqueque iha tinan kotuk, polísia tiru joven ida iha Lautém, polísia tiru joven iha Bidau Akadiru-Hun, polísia baku joven ida iha Maliana ne’ebé mak to’o grave, polísia tiru joven iha Gariuai, polísia tiru sidadaun ida iha Lalulai Baucau no mós konfrontu iha Lourba Munisípiu Bobonaro.

“Kazu sira-ne’e mak ita konsege halo investigasaun finál iha tinan kotuk no ohin lansa ona ba públiku no ohin ita mós entrega ona ba instituisaun polísia”, nia informa.

Kona-ba boa governansaun, Virgílio subliña, PDHJ rejista kazu 10. Hosi kazu sira-ne’e abuzu poder no má administrasaun.

“Bazeia ba ami-nia monitorizasaun iha tinan kotuk, ami rejista kazu má administrasaun ida iha Ministériu Administrasaun Estatál iha ida tanba uza karreta Estadu ba tuir atividade kampaña eletorál iha tinan kotuk, ita mós rejista kazu má administrasaun ida iha Ministériu Agrikultura, ita mós rejista kazu má administrasaun ida iha Ministériu Edukasaun, inklui ministériu sira ne’ebé ohin ita entrega relatóriu ne’e ba sira”, nia mensiona.

PDHJ rekomenda ba instituisaun PNTL no ministériu sira ne’ebé subliña iha relatóriu PDHJ katak tenke hadia nia atuasaun sira iha terenu oinsá atu oferese servisu ne’ebé di’ak ba povu atu povu kontinua garante servisu PNTL iha futuru.

Ba ministériu sira, nia afirma, PDHJ husu atu mellora servisu ne’ebé mak di’ak hodi evita má administrasaun hodi garante ba boa governasaun atu oferese servisu ne’ebé di’ak ba públiku.

“Ida-ne’e mak ami ohin rekomenda ba institusaun PNTLno ministériu sira atu tau matan hodi hadia ita-nia instituisaun hodi oferese servisu ne’ebé di’ak ba públiku”, Virgílio hateten.

Iha fatin hanesan, Komandante Komandu Operasaun Nasionál Komandu Jerál PNTL, Superintendente Xefe, José Soares, rekoñese katak instituisaun PNTL sei iha difikuldade oioin tanba kestaun mai hosi ema oioin no hanoin ne’ebé la hanesan.

“Institusaun PNTL iha membru 4.000-resin ne’ebé durante ne’e ami sei problema barak, tanba instituisaun ne’e kompostu hosi ema barak mai hosi ema oioin no hanoin ne’ebé la hanesan, tanba ne’e ita-nia instituisaun PNTL sei iha difikuldade barak”, nia dehan.

Maske nune’e, Soares afirma, Komandu Jerál PNTL sei hadia problema sira-ne’e hodi hadia instituisaun PNTL ba di’ak liu hodi oferese servsu ne’ebé di’ak ba públiku.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!