Eskola rua iha Samalari sei konstrui iha tinan ne’e
BAUCAU, 07 fevereiru 2024 (TATOLI) – Autoridade suku Samalari, postu Baucau Vila planeia sei konstrui ensinu báziku rua liuhosi atvidade regulár Programa Nasionál Dezenvolvimentu Suku (PNDS) tinan 2024 nian.
Xefe suku Samalari, Rui Magno Sequeira, esplika, liuhosi reuniaun konsellu suku aprova ona projetu tolu hanesan konstrusaun eskola rua no sintina jerál ida ne’ebé submete ona ba PNDS munisípiu Baucau hodi halo análize ba kustu orsamentu.
“Urjente tanba eskola sira-ne’e didin ho piku no agora aat hotu ona,” Xefe suku Samalari informa ba Agência TATOLI iha Vila Nova, kuarta ne’e.
Eskola rua refere hanesan ensinu báziku filliál (EBF) Festau no EBF 20 agostu, aldeia Osoluga ne’ebé kada eskola sei konstrui sala aula tolu, enkauntu sintina públiku sei konstrui iha Lawalia, aldeia Samalari.
Autoridade suku Samalari rasik submete ona planu prioridade ba atividade programa regulár no bainhira prosesu dezeñu no Bill of Quantity (BoQ) sei hala’o hosi PNDS Baucau nune’e bainhira finaliza bele hahú projetu refere.
“Eskola ne’e prioridade tanba prevene estudante sira labele hala’o estudu iha udan-been no loron manas nia okos,” Rui Sequeira akresenta.
Suku Samalari hamutuk aldeia haat komposta hosi Solurai, Festau, Samalari no Ossoluga ho tótal populasaun 3.187 hosi uma-kain 681.
Notísia relevante: UNP faze daruak iha Samalari sei finaliza iha fulan-abríl
Jornalista : Natalino Belo
Editór : Evaristo Soares Martins
