DILI, 07 fevereiru 2024 (TATOLI) – Diretora Nasionál Dezenvolvimentu Turístiku iha Ministériu Turismu no Ambiente, Rosita Garcia, hateten Governu sei reabilita Jardim Cristo Rei no João Paulo II, iha trimestre daruak.
“Ita -nia kalendáriu ba reabilitasaun ba Jardim Cristo rei no João Paulo II, sei hahú iha trimestre daruak tanba daudaun ne’e Ministru Turismu Ambiente Francisco Kalbuadi Lay moras hela no seidauk tama servisu no ita mós tama ona iha fulan fevereiru, entaun ami seidauk aprezenta planu sira-ne’e, signifika ita implementa iha trimestre daruak ba oin”, Rosita Garcia dehan iha nia kna’ar fatin CCD, ohin.
Nia afirma, proposta prontu hotu ona, tanba ne’e bainhira ministru mai, ekipa ba entrega proposta atu bele hean aprovasaun.
Kona-ba konkursu, nia esplika, Governu seidauk loke konkursu ba públiku tanba buat hotu sei hein ministru atu aprova hafoin bele implementa.
“Kona-ba konkursu sira ita seidauk loke ba públiku, tanba to’o agora de’it ita sei hein ministru, se bainhira minsitru mai aprova ita bele hahú ona, tanba konkursu sira-ne’e ita sei loke ba timoroan sira, tanba ita reabilita de’it jardim sira-ne’e, la’os halo buat foun ruma, maibé atu se mak kaer obra ne’e ita loke tiha konkursu mak foin hatene empreza ne’e nia naran”, nia dehan.
Nia relata, Jardim Cristo Rei ho João Paulo II, Governu atu melhora di’ak liután tanba tinan rua ka tolu ba kotuk nunka halo reabilitasaun ba fatin ne’e, entaun ho ida-ne’e presiza hadia buat balun hanesan lampu, eletrisidade, haris fatin, atu bele sai di’ak ba vizitante sira ne’ebé mak ba.
“Jardim Cristo Rei ho João Paulo II ne’e ita la halo foun, ita atu mellora di’ak liután, tanba ita hatene katak tinan rua ka tolu ba kotuk ita seidauk halo reabilitasaun ba fatin rua ida-ne’e, entaun ita hatene katak estragu barak, buat kiik sira hanesan eletrisidade, haris fatin, eskada sira hahú tohik, uma sira halis hotu, entaun ida-ne’e, ita la iha dezeñu maibé tékniku sira tun ba haree hodi verifika ona, entaun ida-ne’e mak ita atu hadia”, nia deklara.
“Banhira ita atu hadia buat prinsipál mak saneamentu, haris fatin no eletrisidade, se bainhira ita hadia di’ak ona ita sei koordena ho ministériu relevante sira oinsá atu tau seguransa iha ne’eba no oinsá bele selu taxa ba fatin sira-ne’e”, nia afirma.
Xefe Departamentu Jestaun Ezekuzaun Polítiku Turismu iha Ministériu Turismu no Ambiente, Luis Doutel Sarmento, informa Jardim Cristo Rei no João Paulo II mak reabilitadu mak sei tau seguransa no mós jardineiru atu tau matan hodi ema labele estraga soe foer arbiru.
“Bainhira reabilita tiha, ita sei tau seguransa, jardineiru nune’e mantein jadim sira hanesan rega ka kuda fila fali ai-funan foun no mós limpezadór hodi rekolla lixu, entaun jestaun ida-ne’e presiza ministériu sira-nia apoiu atu kontrola servisu sira-ne’e ho di’ak liután atu ema labele estraga”, Luis relata.
Rekorda fali katak Ministériu Turismu no Ambiente liuhosi Diresaun Nasionál Dezenvolvimentu Turístiku, aloka orsamentu ho totál rihun 100 ho objetivu atu reabilita Jardim Cristo Rei ho João Paulo II Tasi-Tolu.
Hafoin reabilita Jardim Cristo Rei ho João Paulo II mak Governu sei kontinua harii jardim Munisípiu Lautem, Postu Tutuala (Valu-Sere, reabilita pouzada), ho Praia Kaitehu Liquiça.
Prezidente Autoridade Turismu iha Timor-Leste, Virgílio Smith, dehan ekipa tékniku identifika no halo ona levantamentu ba poténsia turístika iha Munisípiu Lautem, Ainaro, Bobonaro no Dili ho objetivu atu dezenvolve sítiu turístiku.
Relembra fali katak Governu reabilita ona, iha 2023, jardim hitu iha Dili hanesan Jardim 5 de maio, Largo Lecidere, Farol iha Pálasiu Governu oin, jardim babadok iha Mandarin no Motael 12 de Novembro.
Jornalista : Felicidade Ximenes
Editór : Zezito Silva
