MAPPF hakarak sosa mákina dulas kafé unidade 20  

DILI, 07 fevereiru 2024 (TATOLI) – Ministériu Agrikultura Pekuária, Peska no Floresta (MAPPF) prevee rihun $14 ba akizisaun mákina dulas kafé hodi disponibiliza ba kafekultór sira hodi substitui makina sira ne’ebé avaria ona.

Iha 2007, ministériu apoia ona mákina dulas kafé 50 ba agrikultór sira, maibé tanba tinan 17 ona maka avaria ona no atu halo manutensaun sei gasta osan barak.

“Tanba ne’e, diresaun halo ona estimativa katak kada mákina ida ninia presu $700 no prevee ona rihun $14 hodi bele sosa mákina dulas kafé hamutuk unidade 20”, Diretór Nasionál Kafé no Planta Industriál, Julião dos Santos, hatete iha Caicoli, ohin.

Dirijente ne’e reforsa katak mákina ne’ebé sei fornese ba kafekultór sira ne’e ho intensaun atu neutraliza tiha folin kafé iha merkadu, tanba durante ne’e agrikultór sira laiha mákina no empreza sira sosa de’it kafé ho kulit mean, entaun nia folin tun liu ba sentavu 40 ba kada kilógrama. Maibé, ba kafé ne’ebé dulas tiha mak fa’an sei hetan presu ba kada kilo $2.50.

Tanba ne’e, diresaun kontinua esforsu atu kafé ne’ebé agrikultór sira prodús ne’e ninia presu iha merkadu tenke filafali ba normál, nune’e bele garante mós lukru di’ak hodi sustenta nesesidade família sira-nian, liuhusi apoia mákina.

Kafekultór sira ne’ebé mak identifikadu atu hetan mákina dulas kafé ne’e iha munisípiu Aileu, Ainaro, Bobonaro, Ermera, Liquiçá, Manufahi no Manatuto.

Iha munisípiu hitu ne’e mak poténsia ba produsaun kafé no plantasaun kafé iha fatin refere hamutuk ektare 59.921.

Notísia relevante:  Líder komunitáriu husu IX Governu hadi’a folin kafé

Jornalista: Tomé Amado

Editora: Maria Auxiliadora