Líder komunitáriu husu IX Governu hadi’a folin kafé
ERMERA, 02 maiu 2023 (TATOLI) – Líder komunitária husu ba IX Governu Konstitusionál ne’ebé sei mai, atu hasa’e folin kafé.
Kestaun ne’e hato’o hosi Xefe Suku Fatubesi, Postu Administrativu Hatulia B, Armando de Carvalho iha nia intervista ho jornalista Agensia Tatoli, iha Fatubesi, tersa ne’e.
Xefe Suku Armando husu atu governu atual no IX governu ne’ebé sei mai, atu deside kafé folin ne’ebé justu hodi hadi’a kafekultór sira-nia morias.
“Hanesan autoridade lokál suku Fatubesi, hau husu ba governu atuál no mós governu tuir mai deside presu ba kafé iha munisípiu Ermera tanba komundade sira iha hanoin atu hadia kafé, maibé tanba kafé folin durante ne’e ladun di’ak, nune’e halo sira atu hadi’a kafé mós la ho di’ak,” Xefe Suku Armando ba Tatoli, iha sede suku Fatubesi, tersa ne’e.
Nia hateten se kafé folin sa’e bele enkoraja komunidade sira kuda tán kafé no hadi’a kafé ne’ebé mak tuan.
“Kafé folin sae bele ajuda kafekultór nia oan sira ba eskola, sustenta sira-nia nesesidade uma laran. Ne’ebé se kafé folin sa’e, ema hotu iha interese para hadi’a kafé,” líder komunitária ne’e akresenta.
Nia mós husu ba emprezáriu no kompañia sira atu labele halo monopoli ba kafé folin no sosa komunidade nia kafé ho folin ne’ebé mak justu.
“Kompañia sira labele halimar ka monopoli kafé folin tanba, molok to’os nain sira fa’an kafé ne’e, liu hosi prosesu ida naruk no serbisu todan,” nia esplika.
Iha fatin seluk, Xefe Suku Fatubolu, Adelino Soares mós apela ba governu tuir mai, liu husi Ministériu Agrikultura no Peskas bele deside kualidade kafé no kafé folin atu prevene kompañia sira halo monopoli ba folin kafé.
“Governu tuir mai tenke hadi’a folin kafé tanba, povu atu hadi’a kafé mas kafé folin la di’ak. Entaun ba se de’it mak manan iha eleisaun parlamentár hodi ka’er IX Governu tenke tau matan ba povu nia kafé,” Xefe Adelino reiteira.
Nia dehan agora dau-daun kafé komesa tasak ona, ho nune’e husu ba governu atuál no kompañia atu haree ba kafé folin.
“Hakarak kafé kulaidade maibé kafé folin laloos, entaun oinsá mak ita bele hadi’a kafé ne’e para produz kafé ida ne’ebé kulaidade. Tanba ne’e mak ami eziji ba governu atu kontrola kompañia sira liga ho kafé folin,” Adelino konklui.
Jornalista: Filomeno Martins
Editora: Nelia Borges
