Ministériu Justisa disponibiliza atendimentu movél Passaporte no BI ba pasiente no defisiente
DILI, 07 fevereiru 2024 (TATOLI) – Ministru Justisa iha ezersísiu, Paulo Remediós, hateten Ministériu Justisa fó atendimentu movel, Passaporte no Billete Identidade (BI) ba pasiente sira iha ospitál no ba ema ho defisiénsia.
“Agora daudaun, atendimentu Passaporte no BI ba pasiente ema ho defisiénsia la presiza mai to’o iha Diresaun Jerál Servisu Rejistu Notariadu. Ha’u orienta ona Diresaun Jerál Servisu Notariadu para ekipa téknika notariadu oferese atendimentu besik ba pasiente no ba ema ho defisiénsia”, Paulo Remediós hateten ba jornalista sira iha nia kna’ar fatin Colmera, kuarta ne’e.
Nia dehan, atendimentu movél, ekipa notariadu mobiliza mákina produsaun Passaporte no BI ba ospitál hodi atende pasiente sira.
“Maibè ekipa téknika notariadu bele lori mákina produsaun Passaporte no BI ba ospitál hodi bele atende pasiente sira, dokumentu hasai foto hodi prodús Passaporte no BI. Depois mak halo pagamentu ba Passaporte. Buat sira-ne’e ita halo atu fasilita lalais ita-nia sidadaun sira ne’ebé mak moras “, nia adianta.
Kona-ba ema ho defisiénsia, nia salienta, tratamentu Passaporte no BI nele iha notariadu no bele iha uma bainhira iha kontatu ruma hosi notariadu.
“Kuandu sira-nia kondisaun la permite duni hodi mai notariadu, sira bele kontatu ba Ministériu Justisa, ita bele atende Passaporte no BI iha sira-nia uma. Agora ami-nia ekipa téknika notariadu halo hela atendimentu movél ba sira to’o sira-nia fatin, ida-ne’e ha’u orienta ona ho Diretór Jerál Servisu Notariadu atu tékniku notariadu bele halo ida-ne’e no ami halo ona servisu ida-ne’e “, nia afirma.
Jornalista: Natalino Costa
Editór : Zezito Silva
