DILI, 08 fevereiru 2024 (TATOLI)- Governu liuhosi Vise-Primeiru Ministru no Ministro Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, Selebra akordu ho AHHA Education-SOLS 24/7, atu fó formasaun inglés no Portugés ba joven sira iha área rurál.
Governante ne’e afirma akordu ne’e la’ós ho osan, maibé apoia ho matéria no fasilidade.
“Ohin, ita asina akordu kooperasaun servisu ne’ebé uluk hanaran SOLS ka agora hanaran AHHA Education atu sira fó apoiu kursu Inglés no Portugés ba joven sira iha área rurál,”Mariano Assanami hateten ba jornalista sira hafoin selebra kontratu kooperasaun servisu ho AHHA Education, iha Palasiu Governu, sesta horseik.
Governante ne’e dehan, dadaun Governu identifika ona área rurál sira ne’ebé mak AHHA Education atu hala’o formasaun.
Governu estabelese kooperasaun servisu tanba haree ona AHHA Education servisu durante tinan 12 iha Timor-Leste misaun voluntáriu hodi fó kapasitasaun ba joven sira liuhosi lian inglés no mós muda mentalidade joven sira-nia atu aprende lideransa no sai pioneru iha matéria seluk.
“Ami mós hanoin katak ba oin sira mós fo kursu lian Japaun, Korea no Xineza, maibé agora ita konsentra liu ba Inglés ho Portugés. Akordu ida ne’e ba fulan tolu hotu ita sei hanaruk, iha akordu ne’e sente parte ida hatodan parte ami sei hakotu,”nia adianta.
Ho akordu ne’e, Governante ne’e husu ba joven sira tenke partisipa atu kapasita an hodi bele kompete iha merkadu traballu.
Governu laiha duvida servisu hamutuk ho AHHA Education tanba sira ajuda timor-oan barak ba servisu iha rai laran no balun servisu iha rai li’ur inklui barak mós servisu iha Cambodia, iha Malázia no sai formadór lian inglés Japaun.
Tanba ne’e,Assanami apresia ho servisu AHHA Education nia misaun durante ne’e halo Timor-Leste.
Jornalista: Natalino Costa
Editór : Florencio Miranda Ximenes
