iklan

DESPORTU, DILI, HEADLINE

Afrânio Amaral re-eleitu ba Prezidente Atletizmu

Afrânio Amaral re-eleitu ba Prezidente Atletizmu

Prezidente Federasaun Atletizmu Timor-Leste (FTA) Àfranio Xavier Amaral. Imajen Tatoli/Francisco Sony

DILI, 10 fevereiru 2024 (TATOLI) – Asembleia jerál Federasaun Atletizmu Timor-Leste (FATL) ba dala neen ne’ebé realiza sábadu ne’e, iha Ótel Vila-Verde Dili kongresista sira kontinua fó konfiansa ba Afrânio Xavier Amaral kontinua lidera FATL ba mandatu tinan haat hahú 2024-2028.

“Agradese tanba asosiasaun sira kontinua hili ha’u hodi lidera nafatin atletizmu ba mandatu tinan haat tan, servisu ba oin mak oinsa atu kria rekursu ne’ebé kualidade iha asosiasaun sira tuir dekretu lei desportu númeru 40/2020 ne’ebé hatete federasaun sira tenke tau prioridade ba rekursu umanu iha asosiasaun atu haree ba atleta sira,” hatete Afrânio ba jornalista sira hafoin re-eleitu ba Prezidente.

Nia dehan, loloos asembleia jerál atletizmu hala’o iha tinan kotuk, maibé tanba difikuldade orsamentu mak dada to’o ohin loron foin realiza.

“Lolos ita halo ona kongresu ne’e iha tinan kotuk, maibé tanba difikuldade orsamentu mak ami foin bele realiza ohin, osan ami buka rasik no hetan apoiu orsamentu uitoan hosi Komite Olimpiku Timor-Leste (CONTL-sigla portugés) mak foin realiza ohin,” nia katak.

Totaál orsamentu hira mak gasta ba kongresu ne’e, Prezidente ne’e lá mensiona nia montante tanba osan tau rasik hosi federasaun no CONTL.

Kongresu ne’e hala’o partisipa másimu hosi asosiasaun Munisípiu 11 la inklui Viqueque no RAEOA.

Tuir estatutu FATL nian kongresista ne’ebé iha direitu votu mak estrutura asosiasaun Munisípiu ou reprezentante.

Tanba ne’e, asosiasaun hamutuk 11 kontinua fó konfiansa ba Afrânio Xavier Amarál liu hosi votu aklamasaun afavór 11 kontra zero no abstensaun zero.

Hosi votasaun ne’e Afrânio iha direitu absoluta hodi lidera FATL ba mandatu tinan haat.

Hafoin eleitu Afrânio monta kedan nia estrutura mak hanesan Vise Prezidente Domingos da Costa, Sekretáriu Jerál Marlia Lese Pires Moniz no Tesoureira Erna Amaral de Jesus.

Ho maturidade servisu ne’ebé di’ak asosiasaun sira kontinua fó konfiansa ba Afrânio lidera FATL hahú 2002 to’o ohin loron.

Asosiasaun fiar Prezidente lori atletizmu ba oin

Reprezentante Prezidente Asosiasaun Atletizmu Munisípiu Liquiça, Lusinha de Jesus Gonçalves, hatete nafatin fó konfiansa ba Prezidente Afrânio tanba hatudu servisu ne’ebé di’ak no nia husu ba Prezidente atu kontinua hala’o servisu ne’ebé másimu hodi lori atletizmu ba oin.

“Nafatin fó konfiansa ba Prezidente Afrâni lidera federasaun ne’e tanba ema ne’ebé iha esperiensia no servisu di’ak. Ami nia rekomendasaun mak tenke tau prioridade mós ba atleta Munisípiu sira, kria kondisaun ne’ebé di’ak ba atleta Munisípiu sira,” hatete Lisinha.

Iha sorin seluk, reprezentante asosiasaun Manufahi Manuel da Silva husu ba estrutura eleitu atu servisu másimu no trata atleta hotu hanesan.

“Ami husu ba estrutura foun atu servisu ho di’ak, tenke trata atleta sira ho di’ak, trata atleta sira hanesan atu nune’e ita bele lori atletizmu ba oin. Sé bele federasaun esforsu oinsa atu fasilita netik materiál treinamentu nian ba ami, tanba ami iha Munisípiu ne’e materiál treinamentu mak susar, hanesan sapatu, kalsa faru no seluk tan,” nia katak.

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!