DILI, 13 fevereiru 2024 (TATOLI)—Governu liuhosi reuniaun Konsellu Ministru (KM) estraordinária, tersa ne’e, delibera hodi fó poder tomak ba Sekretáriu Estadu Kooperativa, Arsénio Pereira da Silva, hodi asina nota entendimentu ida ho Ministériu Kooperativa no Empreza Ki’ik no Média Repúblika Indonézia.
“Akordu ne’e ho objetivu atu enkoraja, promove no kontribui hodi harii relasaun ne’ebé iha benefísiu ba malu iha dezenvolvimentu kapasidade kooperativa no mikro, empreza ki’ik no empreza média entre parte rua ne’e,” refere nota ne’ebé Agência Tatoli asesu hafoin reuniaun ezekutivu, iha Palásiu Governu.
Notísia relevante : SEKoop rejista tan federasaun kooperativa kréditu uniaun ida
Área kooperasaun ne’ebé prevee iha ámbitu memorandu entendimentu ida-ne’e inklui hasa’e kapasidade ba dezenvolvimentu kuadru polítiku no institusionál liuhosi interkámbiu péritu sira ba dezenvolvimentu kooperativa, mikro, empreza ki’ik no empreza média sira.
Entendimentu ne’e mós ho objetivu atu promove projetu parseria no kooperasaun entre instituisaun sira hosi nasaun rua, nune’e mós entre kooperativa no Mikro Pikena no Média Empreza (MPME).
Aleinde ne’e, prevee mós hodi halo peskiza potensiál emprezariál no estudu viabilidade atu identifika oportunidade dezenvolvimentu kooperativa no MPME nian.
Inisiativa sira seluk inklui promove formasaun no vizita interkámbiu hodi hadi’a kompeténsia téknika no jestaun ba kooperativa, nune’e mós reforsa atividade programátika ba kooperativa no MPME liuhosi kooperasaun rejionál.
Jornalista : Antónia Gusmão
Editora : Julia Chatarina
