Governu sei hala’o estudu ateru sanitáriu iha Baucau

BAUCAU, 26 fevereiru 2024 (TATOLI) – Governu liuhosi Ministériu Planu no Investimentu Estratéjiku (MPIE) tuir planu sei hala’o estudu ateru sanitáriu iha parte leste espesiál postu administrativu Vemasse, munisípiu Baucau.

Diretór Jerál Ordenamentu Territoriál Ministériu Planu no Investimentu Estratéjiku, Roger Tertoliano Belo, esplika, objetivu sorumutu entre MPIE ho Autoridade Administrasaun Munisipál Baucau atu re-estabelese hikas liña koordenasaun hodi implementa estudu ateru sanitáriu nune’e future bele halo jestaun lixu iha área leste hanesan munisípiu Baucau, Viqueque, Manatuto no Lospalos.

“Ita iha ona identifikasaun inisiál rai iha Vemasse tanba ne’e enkontru envolve hotu autoridade lokál,” Diretór Jerál Ordenamentu Territoriál MPIE hateten iha Vila Nova, segunda ne’e.

Situasaun refere foin kontinua fali tanba mundansa governu liuliu estrutura diresaun inklui lideransa autoridade munisipál nune’e importante hametin komunikasaun ho liña koordenasaun atu aselera projetu refere iha tempu besik.

Tuir identifikasaun inisiál fatin ikus lixu ka sanitáriu iha área leste sei estabelese baliza entre iha postu Vemasse, munisípiu Baucau no postu Laleia, postu Manatuto ho medida ektare 14 nune’e planeia sei finaliza estudu iha fulan-maiu.

“Bainhira atu implementa konforme alokasaun orsamentu hosi governu ka bele buka mekanismu seluk,” Roger Belo akresenta.

MPIE husu entidade hotu liuliu autoridade munisípiu no autoridade lokál no komunidade atu kolabora hodi fó susesu ba projeitu refere nune’e futuru bele halo jestaun ba lixu iha área leste.

Jornalista   : Natalino Belo 

Editór          : Evaristo Soares Martins