DILI, 26 fevereiru 2024 (TATOLI) –Prezidente Federasaun Amadora Boxe Timor-Leste (FBATL), Januario da Silva Brito, informa, kampionatu nasionál sei realiza iha fulan-maiu hodi prepara fini atleta ba jogu internasionál.
“Ami hasoru malu ona ho Ministru Juventude Desportu Arte no Kultura (MJDAK) fó ona orientasaun mai ami atu hala’o kampionatu nasionál Boxe nian iha fulan-maiu, ita sei hahú iha loron 10 nune’e to’o loron 20 maiu termina atu komemora mós loron restaurasaun independensia,” Januario hatete ba Agência TATOLI iha Benfica Colmera Dili, segunda ne’e.
Tuir nia, jogu ne’e sei loke ba atleta seniór no juniór nune’e sei envolve atleta hosi Asosiasaun Boxe kada Munisípiu Dili no posibilidade sei konvida mós atleta hosi nasaun viziñu Indonézia.
“Kampionatu nasionál ne’e loloos ami hala’o ba atleta nasionál hosi seniór ho juniór maibé foin lais ami hasoru malu ho Ministru orienta atu konvida mós atleta sira hosi nasaun vizñu atu halo rame jogu ne’e, entaun ami sei ko’alia ho diretór nasionál sira iha MJDAK atu haree ba asuntu ne’e,” nia katak.
Orasamentu ba jogu ne’e aprova ona hosi Governu ho montante $20.000. Jogu sei realiza iha Jináziu Dili.
Kona-ba premiu ba manán na’in sira komisaun sei prepara no halo jestaun ba orsamentu ne’ebé Governu aprova.
Tuir informasaun ne’ebé FBATL hetan, jogu ne’e sei partisipa direita mós hosi Boxista Legendariu Many Paciao.
Fundu apoiu hosi KRAM ba Boxe
Iha tinan 2022-2023 FBATL mós hetan fundu ne’ebé apoiu hosi Komisaun reguladora Arte Marsiál (KRAM) no Boxe konsege ezekuta ona.
“Osan ne’ebé ami apoiu hosi KRAM nian konsege ezekuta ona 40% ida ne’e iha tinan kotuk ami realiza jogu boot ida iha Estádiu Munisipál Dili,” nia relata.
Total orsamentu ne’ebé KRAM haraik ba Boxe hamutuk rihun $147. Hosi orasamentu ne’e KRAM aloka ukuk ona 40% ho total rihun $19 ne’ebé aloka hotu ba jogu ne’ebé FBATL realiza durante semana ida iha tinan kotuk.
“Osan faze primeiru ami ezekuta ona, relatoriu mós ami hatama hotu ona ba KRAM, osan ami gasta iha faze primeiru mak rihun $19, osan ne’e ba premiu manán na’in sira hanesan osan, medalla, sertifikadu, osan transporte ba Munisípiu no hela fatin,” konklui.
Enkuantu kona-bá orsamentu 60% ne’ebé KRAM seidauk aloka ba Boxe tanba dadaun ne’e Governu sei fó hela suspensaun ba arte marsiál tolu hanesan Persaudaraan Setia Hati Terate (PSHT), kmanek Oan Rai Klaran (KORK) no Ikatan Kera Sakti Timor-Leste (IKS-TL) fó mós impaktu ba arte marsiál seluk ne’ebé hetan mós apoiu ne’e.
Jornalista: Hortencio Sanchez
Editór: Florencio Miranda Ximenes
