PERMATIL realiza programa rekupera bee-matan liuhosi kuda bee iha Baucau
BAUCAU, 27 fevereiru 2024 (TATOLI) – Organizasaun naun governamentál Permakultura Timor Leste (PERMATIL) hala’o programa prezerva bee-matan liuhosi realizasaun workshop ho tema kuda bee no hamoris komunidade iha munisípiu Baucau.
Diretór Ezekutivu PERMATIL, Eugénio Fátima Lemos, esplika, durante realizasaun programa refere konsege kuda ona bee hamutuk 300-resin iha territóriu nasionál kompostu hosi aldeia 500-resin inklui Atauro no Oecusse.
“Bele dehan besik 400, ne’ebé ita sei rekolla hela dadus, parese fulan-abríl hetan ona dadus konkreta kona-ba bee matan hira mak konsege hetan rekuperasaun husi programa kuda bee nee,” Diretór PERMATIL hateten iha Vila Nova, tersa ne’e.
PERMATIL iha inisiativa kontinua implementa programa refere liuhosi workshop iha nível munisípiu hotu ho objetivu atu ajusta programa refere iha planu asaun munisipál nune’e bele implementa iha kada suku hodi hamoris fali bee matan sira hodi oferese ba komunidade.
Maneira kuda bee mak hanesan halo uluk identifikasaun ba fatin iha foho leten hafoin ke’e debu hodi akumula udan-been, nunee bele infiltra ba rai okos hamoris fali bee matan sira-ne’ebé ameasa atu maran.
“Se bee mak hela kleur iha debu laran bele halo ba kolam hakiak fali ikan hodi fó produsaun ba komunidade lokál,” Eugénio Lemos akresenta.
Prezidente Autoridade Munisipiu (PAM) Baucau, Veneranda Eurico Marques Lemos Martins, hato’o apresiasaun ba programa kuda bee tanba bele konserva udan-been hodi fó moris fali ba bee matan sira.
Maske munísipiu Baucau riku ho bee matan, maibe iha parte balun bee laiha, nune’e husu ba autoridade sira atu foka liuba programa kuda bee hodi sai hosi situasaun krize bee-moos.
“Kada postu ida organiza xefe suku sira identifika bee dalan, bee matan, identifika rai ne’ebé aas liu iha suku depois lori programa ba hodi halo kompetisaun hosi postu ida ba postu seluk,” Veneranda Lemos akresenta.
Programa kuda bee ne’ebé implementa hosi PERMATIL iha munísipiu Baucau, kuaze kobre ona postu administrativu Baguia, Baucau Vila, Laga, Quelicai, Venilale no Vemasse.
Jornalista : Natalino Belo
Editór : Evaristo Soares Martins
