DILI, 28 fevereiru 2024 (TATOLI)—Centro Nacional Chega, Institutu Públiku (CNC, I.P), kuarta ne’e, asina nota entedimentu ho responsável hosi Assosiacão dos Ex-Prisioneros Politicos Timor-Leste (ASEPPOL), Asosiasaun Profisionál Psikolojia Timor-Leste (APPSTIL) no Asosiasaun Vítima Konflitu Polítika (AVKP) 1974-1999, hodi apoia finansiamentu $71.808 hodi fortalese serbisu instituisaun.
Diretór Ezekutivu, CNC, I.P, Hugo Maria Fernandes, hateten, institutu kada tinan sempre realiza programa ne’e relasiona ho serbisu CNC, I.P.
“Kada asosiasaun hetan finansiamentu ho montante la hanesan, ba ASEPPOL 24.600, APPSTIL $18.000, no AVKP $29.208,” Diretór informa iha salaun Gabinete Apoiu Orgaun Centro Chega! (GAO-CC), iha Antigu Comarca Balide.
Diretór Ezekutivu ASEPPOL, Martinho Pereira, hateten, objetivu prinsipál asina nota ne’e hodi simu finansiamentu hodi hala’o programa no atividade asosiasaun iha tinan 2024.
“Apoia ne’e ba utilizasaun tinan-ida nian atu responde ba misaun Centro Chega! hodi promove implementasaun no rekomendasaun Comissão de Acolhimento, Verdade e Reconciliação de Timor-Leste (CAVR), relasiona ho institusionalizasaun memória no promosaun direitu umanu liuhosi edukasaun, formasaun, peskiza no solidariedade ba sobrevivente vulnerável liuhosi violasaun direitu umanu nomós promove rekomendasaun komun CAVR no Comisaun Verdade Amizade (CVA) kona-ba konstrusaun sentru nasionál memória, peskiza no aprendizajen,” nia akresenta.
Notísia relevante : ASEPPOL lori eis prizioneiru polítiku nia lian ba Governu fó tulun
Iha fatin hanesan, Prezidente APPSTIL, Lauriano Fernandes, dehan, orsamentu ne’ebé hetan sei utiliza responde ba atividade no planu programa tinan ne’e hanesan fortalesimentu serbisu asosiasaun no fó asisténsia ba sobrevivente sira ne’ebé sofre moras saúde mentál.
“APPSTIL nia programa asiténsia saúde mentál ba sobrevivente sira ne’e tanba atu responde ba misaun Centro Chega,” nia tenik.
Implementasaun rekomendasaun chega kona-ba Estadu Timor-Leste hodi tau-matan ba ema hirak ne’ebé sei kontinua nafatin lori terus fíziku, mentál ka forma tratamentu dezumanu ne’ebé hatun ema-nia dignidade iha sosiedade.
Nune’e mós, Diretór Ezekutivu AVKP 1974-1999, Domingos Araújo Moniz, komprometidu sei utiliza orsamentu ho di’ak hodi realiza atividade no programa sira.
Jornalista : Arminda Fonseca
Editora : Julia Chatarina
