DILI, 29 Fevereiru 2024 (TATOLI) – Governu liuhosi Ministru Juventude, Desportu, Arte no Kultura (MJDAK), Nelyo Isaac Sarmento no Sekretáriu Ezekutivu Komisaun Nasionál Desportu (KND), Cesarino da Silva, ho estrutura sira deside estabelese National Anti Doping Organizational (NADO) no atribuisaun prémiu ba atleta ho prestasaun di’ak iha paraolimpiku ne’ebé to’o agora pendente hela.
Iha intervensaun, Ministru Nelyo husu organizasaun desportiva sira iha rai-laran atu hakru’uk ba regulasaun sira Estadu nian inklui atividade desportu sira ne’ebé reprezenta Estadu ba iha rai li’ur.
“Primeiru reuniaun hahú 2024 atu uza oportunidade hodi dezenvolve iha área desportu no atividade sira seluk, liuliu orgaun foun sira ne’ebé mak atu suporta atividade ne’e la’o tantu nasionál no mós internasionál. Hanesan Estadu diretu demokratiku, kualker atividade hotu-hotu iha desportu nian tenke tuir Estadu nia obrigasaun ba organizasaun desportiva sira,” Governante ne’e hatete bainhira hala’o sorumutuk ho estrutura KND iha MJDAK, kinta ne’e.
KND hanesan orgaun reguladór ba desportu sira maske independentemente, nune’e Governu labele interven maibé politikamente Estadu iha direitu no dever apoiu servisu organizasaun desportivu sira.
Servisu KND ne’e mós atu haree ba utilizasaun públiku ba federasaun sira ho nia problema sira ne’ebé federesaun enfrenta inklui estabelesimentu Autoridade Nasional Anti Doping.
Iha okaziaun ne’e, Koordenadór Sekretáriu Ezekutivu KND, Cesarino da Silva, hatete, iha reuniaun ne’e ko’alia kona-ba estabelesimentu ba NADO no fó solusaun ba prémiu ba atleta prestasaun sira ne’ebé durante tinan hirak sei pendente hela.
“Treinadór paralimpiku nian hosi modalidade para-tennis meja no modalidade para-powerlifting iha ASEAN Para-Games Cambodia seidauk hetan direitu ba atribuisaun prémiu inklui desizaun ba atribuisaun bolsu estudu Boxista Sea Games Vietname 2022, Delio A. Mouzinho, nune’e iha tempu besik bele atribui”, katak
Estabelese Autoridade Nasionál Anti Doping
Iha sorumutu KND ne’e mós deside estabelese Autoridade Nasionál Anti Doping tanba hanesan nasaun ne’ebé ratifika konvensaun antidoping Organizasaun Nasaun Unida ba Edukasaun, Siensia no Kultura (UNESCO).
Timor-Leste presiza autoridade ida ne’ebé bele kontrola atleta sira tuir regra antidoping nune’e bele prevene lala’ok doping tanba importante tebes ba atleta sira nia vida tomak bainhira tuir jogu ruma.
Timor-Leste nu’udar nasaun ba dala-188 mak ratifika konvensaun antidoping UNESCO iha loron 11-marsu 2019. Konvensaun ne’e adopta iha loron 19 outobru 2005 nu’udar instrumentu prátiku ne’ebé Governu formaliza nu’udar kompromisiu luta kontra doping.
Ho ratifika konvensaun ne’e automatikamente Timor-Leste adere ba Ajénsia Mundial Antidopajen (WADA, sigla Inglés).
Jornalista: Hortencio Sanchez
Editór : Florencio Miranda Ximenes
