Brazil kompromete apoia estabelesimentu Supremu Tribunál Justisa

DILI, 07 marsu 2024 (TATOLI) – Embaixadór Brazil ba Timor-Leste, Maurício Medeiros de Assis, hateten Governu Brazil kompromete atu kontinua apoia Governu Timor-Leste liuliu Ministériu Justisa ba ba estabelesimentu Supremu Tribunál Justisa (STJ).
“Ohin, ha’u mai halo enkontru ho Ministru Justisa Señor Sergio Hornai hodi felizita nia ba kargu Ministru Justisa foun no iha biban ne’e lori Governu Brazil hodi afirma katak kontinua apoia kooperasaun ne’ebé Brazil ho Timor-Leste iha ona liuliu iha setór justisa. Ami mós kompromete katak sei kontinua apoia programa Governu Timor-Leste liuliu Governu Xanana nian iha setór Justisa no ba oin ami sei hamutuk ho Ministériu Justisa hodi koalia kona-ba kriasaun Supremu Tribunál Justisa”, Maurício Medeiros de Assis, dehan ba jornalista sira hafoin enkontru kortejia ho Ministru Justisa Sergio Hornai iha nia kna’ar fatin Colmera, kinta ne’e.
Diplomata Brazil salienta katak Ministru Justisa Sergio Hornai la’os ema foun ba Brazil, nia ema ne’ebé amigo di’ak ho Brazil, nia hatene di’ak liu apoiu saida mak durante ne’e Brazil fó ona iha setór justisa.
“Ami iha programa ida naran fortalesimentu iha setór justisa ne’ebé ami durante ne’e hala’o kle’ur ona ho Governu Timor-Leste tanba ho enkontru ida-ne’e ami afirma hodi kontinua programa ida liuliu fortalese ami-nia apoiu ba Defensór Públiku no ba Tribunál oinsá atu formasaun ba Defensór, Juiz no ofisiál Justisa atu garante asisténsia jurídika judisiária ba sidadaun sira”, nia afirma.
Iha fatin hanesan, Ministru Justisa, Sergio Hornai, hateten Embaixadór Brazil ba Timor-Leste Maurício Medeiros de Assis, halo enkontru kortezia ho nia atu kongratula nia ba kargu Ministru Justisa foun.
Nia dehan, liuhosi enkontru ne’e Brazil afirma kontinua apoia hodi fortalese kooperasaun ne’ebé durante ne’e la’o ona iha setór justisa.
“Sira hakarak mantein kooperasaun iha área tolu mak hanesan oinsá fó apoia ba Defensór Públiku nian servisu atu fó asisténsia jurídiku ba komunidade ho di’ak liután”, nia haktuir.
Governante ne’e dehan, Brazil mós kontinua fó apoiu ba servisu rejistu notariadu liuliu atende passaporte, Servisu Nasionál Kadastru (CNC, sigla portugés) oinsá atu halo levatamentu rai liuliu domíniu públiku sira ho di’ak no atribuisaun sertifikadu rai ba komunidade ho di’ak.
Nune’e mós Brazil hatoo prontidaun kontinua fó asisténsia lian portugés ba Juiz, Defensór no ofisiál justisa atu garante servisu siénsia téknika ba jurídiku no judisiáriu ba povu ho di’ak.
Nia dehan, Brazil mós sei apoia Polísia Judisiária Timor-Leste (PCIC), atu ba oin PCIC bele sai polísia judisiária ne’ebé exelente, tanba Brazil nudar Estadu ne’ebé iha demókrasia no Estadu ida respeitu ba direitu umanu no justisa.
Jornalista: Natalino Costa
Editór : Zezito Silva

