Top

Tékniku notariadu na’in-rua ba Reinu Unidu renova Passaporte no BI timoroan nian

Passaporte eletróniku komún kór me’an no diplomata kór metan. Foto/espesiál.

DILI, 07 marsu 2024 (TATOLI) – Ministru Justisa Sergio Hornai haruka ona tékiniku hosi Diresaun Jerál Servisu Rejistu Notariadu na’in-rua hodi ba esstranjeiru hodi halo atendimentu renovasaun ba Billete Identidade no Passaporte ba sidadaun timoroan ne’ebé rezide iha Reinu Unidu (Inglaterra).

“Ministériu Justisa haruka ona nia tékniku na’in-rua hodi ba Inglatera no sira-na’in-rua ne’e ba iha kuarta (6/3) horseik no sira ba hamutuk ho ita-nia Embaixadór Timor-Leste ba Inglatera Paulo Rangel no horseik sira ba ona”, Sergio Hornai dehan ba jornalista sira iha nia kna’ar fatin Colmera, kinta ne’e.

Governante ne’e dehan, tuir tarefa servisu ne’ebé tékniku na’in-rua hosi Ministériu Justisa sei halo durante estadia Inglatera mak atu fó asisténsia hodi halo atendimentu ba renovasaun dokumentu komprovativu sira hanesan BI no Passaporta ba sidadaun timoroan ne’ebé iha diáspora liuliu ba hirak ne’ebé rezide iha Reinu Unidu (Inglatera).

“Tuir despaixu ne’ebé ha’u asina, ita fó tarefa servisu ne’ebé klaru katak durante sira-na’in-rua iha Inglatera buka kolabora ho ita-nia embaixadór iha Inglatera hodi fó atendimentu ba renovasaun ba BI no Passaporte ba sidadaun timoroan ne’ebé hela iha Reinu Unidu”, nia adianta.

Sergio Hornai kompromete katak sei tau adidu permanente Ministériu Justisa nian iha rai li’ur hanesan Korea, Austrália no Portugál atu bele fó atendimentu ba renovasaun ba BI no Passaporte.

“Ita sei haree ba oin kuandu nesesáriu duni mak ita koloka ita-nia ekipa tékniku ba rai sira hanesan Korea, Austrália no Portugál atu bele fó atendimentu renovasaun ba BI no Passaporte”, nia konklui.

Jornalista: Natalino Costa

Editór : Zezito Silva

 

 

 

Publisidade

Leave a Reply

Latest Post

error: Content is protected !!