BAUCAU, 09 marsu 2024 (TATOLI) – Autoridade postu administrativu Quelicai, munísipiu Baucau, planeia tinan-ne’e sei fó prioridade ba bee-moos liuhosi reuniaun asembleia postu administrativu.
Administradór Postu Admistrativu Quelicai, Paulo Jacinto Moreira, esplika, planu refere sai prioridade tanba konsidera bee-moos nu’udar nesesidade bázika ba komunidade nos ai prekupasaun iha postu refere tanba maioria suku ne’ebé eziste seidauk asesu bee-moos.
“Ita sei planu hamutuk entre autoridade suku sira hotu realiza enkontru iha reuniaun asembleia postu antes enkamiña mai autorodade munisípiu,” Administradór Postu Quelicai hateten iha Vila Nova, sesta ne’e.
Enkontru asembleia postu administrativu rasik nu’udar desizaun altu iha postu ne’ebé sei define planu hosi kada suku bazea ba dekretu-lei númeru 84/2023, alterasaun ba dala-lima hosi dekretu-lei númeru 3/2016.
Maske nune’e iha postu Quelicai Vila ne’ebé kobre suku tolu hanesan Letemumu, Baguia no Laculio, atualmente sei iha faze implementasaun projetu hosi Bee Timor-Leste, empreza publiku (BTL,ep) nune’e bainhira remata sei fasilita ba edifísiu públiku no komunidade.
Enkuantu suku seluk maake iha bee-matan maibé volume bee menus no komunidade presiza la’o ho distánsia dook atu asesu bee-mos.
“Ami ajenda ona iha loron-12 fulan-ne’e sei hato’o iha reuniaun asembleia postu,” Paulo Moreira akresenta.
Postu Quelicai hamutuk suku 15 kompostu hosi Abafala, Abo, Afaça, Baguia, Bualale, Gurusa, Laculio, Laisorulai de Baixo, Laisorulai de Cima, Lelalai, Letemumo, Macalaco, Maluro, Namanei no Uaitame ho totál populasaun 16.747.
Jornalista : Natalino Belo
Editór : Evaristo Soares Martins
