DILI, 08 marsu 2024 (TATOLI) – Prezidente Repúblika (PR) José Ramos Horta fó parabéns ba feto hotu iha Timor-Leste no alerta katak, fó kbiit ba feto sira mak xave ba progresu Timor-Leste (TL) nian.
“Iha Loron Internasionál Feto nian iha tinan 2024, Timor-Leste reforsa ninia kompromisu maka’as atu investe iha empoderamentu feto no labarik-feto sira iha setór hotu-hotu. Fó kbiit ba feto sira,” Xefe Estadu hatete liu hosi nota ne’ebé Agência TATOLI asesu, ohin.
Nia hatutan, investe iha feto sira-nia edukasaun, kuidadu saúde, oportunidade ekonómiku no papél lideransa, aselera progresu ba sosiedade tomak.
“Feto ida-ne’ebé iha kbiit boot hasa’e dignidade nia família, nia komunidade no ita-nia nasaun. Mai ita kontinua halakon barreira sira, dezafiu ba estereotipu jéneru no kria mundu ida-ne’ebé hanesan, iha ne’ebé feto ida-idak bele atinji nia potensialidade tomak sein impedimentu,” katak.
Ksolok Loron Internasionál Feto ba Feto hotu-hotu ne’ebé iha Timor-Leste no iha mundu tomak, ne’ebé nia reziliénsia, determinasaun, no kontribuisaun forma futuru ida-ne’ebé di’ak liu ba ema hotu.
Jornalista: Hortencio Sanchez
Editór: Florencio Miranda Ximenes
