Rezolve problema inundasaun, Xefe governu koordena ekipa tuun terrenu
DILI, 11 marsu 2024 (TATOLI) – Hadi’a kanalizasaun bee moos ne’ebé kotu no suru sai rai no fo’er ne’ebé nakonu iha valeta laran, Primeiru-ministru, Kay Rala Xanana Gusmão, koordena ho ekipa hanesan Ministériu Obras Públika (MOP), IGE-ADI, Sekretária Estadu Eletrisida Água no Saneamentu, Eletrisidade de Timor-Leste, Empreza Públika (EDTL, E.P), BEE Timor-Leste E.P, Sekretaria Estadu Asuntu Toponómia no Organizasaun Urbana no Sekretáriu Estadu Reflorestasaun no Autoridade Munisípiu Dili tuun direita ajuda.
Koordenasaun ida ne’e xefe Governu halo tanba “Udan-boot ne’ebé akontese iha domingu lorokraik iha área foho Becora Karau Maten, Balibar no Dare nian rezulta mota boot tuun maka’as hodi halo uma komunidade nian lubuk ida iha Taibesi, Becora no Bidau Masaur no Santa Ana kontinu sobre ba inundasaun”.
Tuir komunikadu, Kompaña Monta Diak, BTK no Dili United oferese mós karreta, no Eskavatór ajuda sura sai tahu no fo’er, enkuantu ekipa Bombeiros kontinua fase kedas estrada ne’ebé tahu no fo’er nakonu iha área Metiaut nian.
Ekipa sobu mós ponte ki’ik iha área Bidau Santa Ana hodi monta fila fali manila foun hodi fasilta bee mota dalan bele liu ho di’ak hodi evita inundasaun labele akontese fali ba komunidade nia uma.
Diretora Nasionál Manutensaun no Konservasaun Vias Rodovarias, Letigia dos Reis Hanjam Corbafo informa katak, servisu sira hala’o bazeia ba orientasaun Xefe Governu Xanana.
“Hahú dadeer to’o lorokraik ne’e ekipa Ministériu Obras Publika (MOP) nian mai tomak simu orisentasaun hosi Primeiru-Ministru, Kay Rala Xanana Gusmão atu buka solusaun ba problema inundasaun ne’e, tanba valeta bee dalan barak intupidu nakonu ho fo’er presiza hadia urjénsia,” Diretora Letigia informa, tuir komunikadu ba Tatoli, ohin.
Iha segunda (11/03/24) dadeer ne’e ekipa sira sei kontinua hala’o nafatin serbisu to’o ramata.
Tatoli
