iklan

BAUCAU, HEADLINE, MUNISÍPIU, SEGURANSA

PNTL suspeita autór na’in-neen bá kazu tuda mikrolete iha Baucau

PNTL suspeita autór na’in-neen bá kazu tuda mikrolete iha Baucau

Mikrolete diresaun Baucau Vila ne'ebé hetan tuda hosi ema deskoñesidu iha área Vila Antiga. Imajen espesiál.

BAUCAU, 14 marsu 2024 (TATOLI) – Komandu Polísia Nasionál Timor-Leste (PNTL), Munísipiu Baucau, suspeita autór na’in-neen ba kazu tuda mikrolete iha Baucau.

Komandante PNTL Munisípiu Baucau, Superintendente Xefe Antoninho Mauluta, esplika, hafoin kazu tuda karreta mikrolete haat hosi deskoñesidu PNTL kontinua kedas halo kontaktu ho autoridade postu inklui orienta membru sira halo identifikasaun iha fatin akontesimentu hodi fó sai avizu atu suspeitu sira entrega aan ba parte kompetente.

Komandante PNTL munisípiu Baucau, Superintendente Xefe Antoninho Mauluta. Imajen Agência TATOLI/Natalino Belo.

“Suspeitu sira na’in-neen mak entrega aan, ne’ebé oras ne’e daudaun prosesu ona iha investigasaun iha eskuadra Baucau Vila,” Komandante PNTL munisípiu Baucau hateten iha Vila Nova, kinta ne’e.

Suspeitu na’in-neen refere entrega aan iha loron-kuarta, 13 marsu ho inisiál PF, DFA, JDC, MSRS, JS no MDJ ne’ebé rejista nu’udar sidadaun hosi suku Bahú, hosi aldeia Macadae no Ana-Ulo, postu Baucau Vila.

Tuir investigasaun, kazu refere akontese iha loron-segunda, 11 marsu bainhira kondutór mikrolete ho marka (naran) fini hetan agresaun fízika no kontinua ho atake malu iha Vila Antiga hamosu tuda malu hodi rezulta karreta mikrolete sira hetan estragus.

“Agora sei iha faze investigasaun, ita hein prosesu iha Ministériu Públiku atu defini ikus ne’e suspeitu se loos mak sai autór prinsipál,” Superintendente Xefe Antoninho Mauluta akresenta.

Antoninho Mauluta konsidera kazu refere kategoria ba grave tanba estragus mikrolete ne’ebé sai transporte publiku iha Vila Antiga no Vila Nova Baucau Vila nune’e presiza aselera atubele hetan solusaun tuir justisa.

PNTL Baucau husu ba komunidade liuliu juventude atu labele asalta malu, tuda karreta no kontinua kolabora ho parte seguransa bainhira iha indisiu problema nune’e bele halo lalais prevensaun.

Notísia relevante: Mikrolete haat hetan tuda hosi ema deskoñesidu iha Baucau

Jornalista   : Natalino Belo 

Editór         : Evaristo Soares Martins

iklan
iklan

Leave a Reply

iklan
error: Content is protected !!