CCT sei distribui ai-oan planta indústria hamutuk 200,000
ERMERA, 17 marsu 2024 (TATOLI) – Cooperativa Café Timor (CCT) kompromete sei distribui ai-oan 200,000 husi planta indústria tipu lima – kafé, Kakau, vanilla, pimenta, no kraviñu (cengkeh) tinan ne’e.
Supervizor CCT Railako-Ermera, Jose Almeida dos Santos hato’o katak intensaun hasa’e produsaun no distribuisaun ai-oan husi planta indústria lima ne’e atu hadia agrikultór sira-nia moris hodi kore povu husi kiak no mukit.
“Iha tinan kotuk, ita distribui ai-oan hamutuk 123,000 resin. Maibé, tinan ne’e ita hakarak hasa’e ita nia produsaun númeru ai-oan to’o 200,000,” Jose promete.
Nia esplika katak, ai-oan 200,000 resin ne’ebé sei distribui iha 2024 kompostu husi kafé Arabika oan hamutuk 50,000 resin, no kafé Robusta oan 30,000 resin: “Ita mos sei distribui ai-mahon kafé, inklui ai-santuku hamutuk 100,000 resin no Ai-kakeu 30,000.”
Nia dehan, CCT mos sei distribui pimenta, kakau, cengkeh no vanilla oan iha 2024 ho kuantidade boot: “Distribuisaun ai-oan sira ne’e gratuita no CCT mak sei transporta to agrikultór sira nia fatin.”
Jose hato’o katak razaun distribuisaun kafé no ai-mahon kafé mak barak liu tanba CCT hakarak halo rejuvenasaun ba plantasaun kafé ne’ebé mak tuan no la produtivu.
“Koalia konaba rejuvenasaun kafé, ita lá’os deit distribui ai-oan, maibé ita mos distribui adubu orgániku atu asegura ai-oan sira ne’e moris di’ak to’o fo produsaun. Tinan ne’e ita sei distribui 100,000 tonelada adubu orgániku ba kafekultor iha munisipiu ne’en – Ermera, Aileu, Ainaro, Liquiça, Bobonaro no Manatuto. Ita mos iha ekstensionista ka tékniku profesional hamutk 500 resin hodi orienta komunidade kafekultor sira kuda kafé tuir Prátika Kuda Kafé Di’ak,” Jose ba Tatoli iha nia knaar fatin, Postu Administrativu Railako, Munisipiu Ermera.
Alem programa rejuvenasaun, Jose informa katak CCT mos halo ona rehabilitasaun ba plantasaun kafé hamutuk ektare 11,060 iha munisipiu ne’en desde 2008.
Tuir dadus Agrikultura Munisípal Ermera, entre postu administrative sira iha Munisípiu Ermera, Hatulia A mak iha pontesia boot ba plantasaun kafé ho area hamutuk ektare 11,375, tuir kedas ho Postu Administrativu Letefoho ho area ektare 7,814, Ermera ho ektare 7,621, Hatulia B ho ektare 4,500, Atsabe ho ektare 2,529, no area ki’ikoan liu mak Railako ho ektare 216.
Tuir dadus esportasaun kafé husi Cooperative Café Timor (CCT), kafe ne’ebé mak kompania ne’e esporta ba rai liur tun kada tinan.
Iha 2022, CCT relata katak esportasaun kafé husi CCT tun 40% husi 3,500 tonelada iha 2021 bá 1,600 tonelada iha 2022. Ida ne’e hatudu redusaun signifikativu no persiza programa rejuvenasaun seriu.
Cooperativa Café Timor (CCT) estabelese iha 1994 no sai ona kooperativa kafé orgánika boot iha mundu ho ninia membru hamutuk 20,000 resin.
Jornalista: Afonso do Rosario
Editor: Filomeno Martins
