Autoridade sei buka tuir tratór ne’ebé Governu fahe ba grupu agrikultór iha Baucau
BAUCAU, 18 marsu 2024 (TATOLI) – Autoridade Administrasaun Munisipál Baucau, sei buka tuir tratór ne’ebé antes ne’e governu anteriór fahe ba grupu agrikultór sira iha munisípiu Baucau.
Prezidente Autoridade Munisipál (PAM) Baucau, Veneranda Eurico Marques Lemos Martins, esplika, parte autoridade rekolla ona dadus no informasaun hosi Servisu Munisipál Agrikultura relasiona ho tratór hirak-ne’ebé ne’ebé governu anterior fahe iha munisípiu Baucau.
“Ami sei buka tuir mákina sira-ne’e, agora iha-ne’ebé, se karik maka hetan kuandu aat ona tenke hatete fali mai, grupu ne’ebé mak hetan favór informa fali tanba ema hotu iha direitu hanesan atu uza materiál ne’ebé estadu oferese,” Prezidente Autoridade Munisipál Baucau hateten iha Vila Nova, segunda ne’e.
Autoridade Baucau rasik rekolla ona dadus hosi Servisu Munisipál Agrikultura Baucau, liuliu lista benefisiáriu sira, tantu grupu no individuál ne’ebé distribui ba suku 54 iha postu administrativu neen.
“Karik ladi’ak presiza hadi’a, tenke fó hatene ba idak-idak nia koordenadór, fó hatene ba diretór agrikultura nune’e ita halo manutensaun ba makina sira-ne’e,” Veneranda Lemos akresenta.
Governu anteriór iha tinan-2008 fahe tratór iha munisípiu Baucau hamutuk 211 ne’ebé distribui ba grupu agrikultór sira iha postu admistrativu neen kompostu hosi postu Baucau Vila hamutuk 67, Venilale 54, Vemasse 41, Laga 23, Quelicai 14 no postu Baguia 12.
Jornalista : Natalino Belo
Editór : Evaristo Soares Martins
