iklan

HEADLINE, SEGURANSA

 Komandu PNTL prioritiza konstrui postu polísia iha zona krime

 Komandu PNTL prioritiza konstrui postu polísia iha zona krime

komandante Sup Xefi munisipiu Dili, Orlando Gomes. Imajen/TATOLI

DILI, 18 marsu 2024 (TATOLI) – Komandante Polísia Nasionál Timor-Leste (PNTL), Superintendente Xefe Orlando Gomes, hateten Komandu Polísia, iha tinan-ne’e, sei fó prioridade ba konstrusaun postu polísia iha Dili, espesialmente iha zona krime inklui disponibiliza formasaun ba Konsellu Polisiamentu Komunitáriu.

”Kamandu Munisípiu Dili, tinan ne’e, sei haree hodi fó prioridade kona-ba atu konstrui Postu Polísia iha kapitál Dili iha fatin sira ne’ebé mak ita identifika hanesan área ba krime atu ita bele prevene krime no ita hakarak treinamentu fila fali ba Konsellu Polísiamentu Komunitáriu tanba durante ne’e KPK funsiona ladún di’ak tanba ne’e ita sei haree hodi retiva fila fali iha tinan ida-ne’e”, Superintendente Xefe Orlando Gomes, dehan ba jornalista sira iha nia kna’ar fatin Komandu PNTL Caicoli, ohin.

Nia akresenta, Komandu sei haree fila fali mata-dalan Konsellu Polisiamentu Komunitáriu liuliu KPK nian servisu iha komunidade sira nian leet, oinsá kolabora ho Ofisiál Polísia Suku (OPS) ho Autoridade Lokál atu bele prevene konflitu iha suku sira.

“Ita hakarak KPK iha 31 suku, servisu tuir mata-dalan ne’ebé mak iha atu nune’e bele haree didiak problema sira ne’ebé mosu bebeik iha bairru, kauza ne’e mai hosi ne’ebé loloos nune’e ita bele buka tuir nia abut para bele buka solusaun ba ida-ne’e”, nia revela.

Gomes rekoñese katak KPK, durante ne’e, servisu ladún efetivu tanba servisu ho voluntáriu maibé kuandu Komandu PNTL Dili hadia ona mata-dalan, entaun Komandu sei haree orsamentu balun atu bele finansia sira-nia servisu.

“Ha’u hanoin KPK, agora daudaun, ita forma ho voluntariamente, agora Xefe Suku no Xefe Aldeia ne’e mak saláriu iha, maibé KPK ba oin ita sei haree atu insentiva osan balun, ita iha orsamentu atu nune’e KPK bele serviu di’ak liután, atu nune’e haree kona-ba problema ne’ebé mak mosu nune’e bele halo prevensaun ba krime sira ne’ebé mak mosu iha suka laran” nia konklui.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!