iklan

HEADLINE, SEGURANSA

PNTL detein suspeitu na’in-tolu tanba ameasa membru Governu

PNTL detein suspeitu na’in-tolu tanba ameasa membru Governu

Komandante Sup Xefi Munisípiu Dili, Orlando Gomes. Imajen Tatoli/Francisco Sony

DILI, 18 marsu 2024 (TATOLI) – Komandante Polísia Nasionál Timor-Leste (PNTL), Superintendente Xefe, Orlando Gomes, hateten PNTL detein ona suspeitu na’in-tolu iha área Aitarak-Laran AX, ADB no ASP tanba ameasa Sekretáriu Estadu Asuntu Toponímia Organizasaun Urbana (SEATOU), Germano Santa Birtes, bainhira governante ne’e hala’o inspensaun ba jogu bola Guling iha área Aitarak-Laran, Postu Adminitrarivu Dom Aleixo no Munisípiu Dili.

Insidente ne’e akontese bainhira (SEATOU) Germano Santa Birtes ho ekipa konjunta hala’o operasaun hodi taka atividade Bola Guling iha área Aitarak-Laran nian, bainhira governante ne’e foin husu dokumentu komprovativu ba atividade lisensiamentu ba Bola Guling ne’e, maibé iha sidadaun na’in-tolu ameasa direta.

Ho akontesimentu ne’e, ekipa konjunta detein kedan ema na’in-tolu no lori kedan suspeitu sira ne’e ba Eskuadra Dom Aleixo hodi submete ba prosesu investigasaun.

“Ita-nia sidadaun na’in-tolu ho insiál AX, ADB no ASP tenta perturba hodi kontra ekipa refere no hasai liafuan ameansa ba Sua Exelénsia Sekretáriu Estadu Topónomia mak Polísia Nasionál Timor-Leste halo kedas detensaun imediata ba suspeitu sira no lori kedas ba eskuadra Dom Aleixo hodi halo prosesu investigasaun no detein kedan sira ba oras 72”, Superintendente Xefe Orlando Gomes, hateten ba jornalista sira iha kna’ar Komandu PNTL Caicoli, segunda, ohin.

Nia dehan, suspeitu sira-nia hahalok ne’e viola Kódigu Penál artigu 241 no 243 hanesan ameasa no obstrusaun ba autoridade públiku inklui jogu ilísitu.

“Joven na’in-tolu ne’ebé ameasa SEATOU ne’e ita konsidera krime obstrusaun ba autoridade públiku no ida-ne’e ita konsidera krime”, nia salienta.

Aleinde PNTL halo detensaun ba sira, polísia asegura evidénsia balun hanesan meja bola guling atu sai evidénsia ba investigasaun.

Gomes hateten, autoridade seguransa sempre fó seguransa ba ema hotu bainhira sé de’it mak atu halo krime obstrusaun públiku ou kontra krime organizadu ruma, PNTL prontu halo operasaun imediatamente.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!