iklan

HEADLINE, SEGURANSA

Komandu PNTL sei promove membru polísia 300

Komandu PNTL sei promove membru polísia 300

Komandante Sentru Formasaun Polísia (SFP), Superentendente, Arquimino Ramos. Imajen Tatoli/ Egas Cristóvão

DILI, 19 marsu 2024 (TATOLI) – Komandante Komandu Pesoál no Formasaun, Superintendente Xefe, Arquimino Ramos, dehan Komandu Jerál PNTL deside ona atu halo promosaun deviza ba membru Polísia Nasionál Timor-Leste (PNTL) hamutuk 300, iha ámbitu komemorasaun aniversáriu PNTL ba dala-24 ne’ebé sei hala’o iha kuarta (27/3).

Komandu Jerál PNTL deside membru 300 ne’ebé atu halo promosaun deviza ho antiguidade hotu no maioria ho postu ajente sei promove ba ajente prinsipál, ajente xefe sei prommove ba postu sarjentu no postu sarjentu sei promove ba xefe no sarjentu xefe no sei promove ba postu subalterñu.

“Ba promosaun deviza, parte Departamentu Pesoál Formasaun halo hela preparasaun, agora prosesu sei la’o hela. Promosaun deviza ba antiguidade ita prepara hotu, hein de’it taka sai naran”, Superintendente Xefe Arquimino Ramos, hateten ba jornalista sira iha Kuartel Jerál PNTL Caicoli, tersa ne’e.

Arquimino esplika, membru PNTL ne’ebé sei hetan promosaun sei liuhosi prosesu ezame prova kulturál no prova médika, enkuantu buat sira-ne’e remata ona mak sei públika rezultadu.

“Ohin balun hahú halo ona ezame bazea ba kritériu ne’ebé PNTL iha ona, molok halo promosaun deviza ba sira. Ba sira ne’ebé pasa iha ezame promosaun ne’e, Komandu Jerál PNTL sei halo aprovasaun ba lista finál ho despaixu ida hosi Komandu Jerál rasik no ba membru sira ne’ebé mak naran tama iha lista ne’e mak ami sei konvida sira”, nia subliña.

Nia mensiona, Komandu Jerál PNTL sei fó sai membru PNTL ne’ebé mak atu hetan promosaun deviza iha 26/3/2023 tanba promosaun deviza ne’e hanesan direitu ida ba membru PNTL hotu, hahú hosi membru PNTL ne’ebé destaka iha Kuartel Jerál PNTL, membru Komandu PNTL Munisípiu sira no membru unidade sira, bainhira sira priénse ona rekezitu ba promosaun, entaun automatikamente Komandu PNTL tenke halo promosaun deviza ba sira.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!