Top

 Notariadu hapara provizóriu emisaun Passaporte

Ekipa téknika halo atendimentu ba sidadaun sira-nia pedidu emisaun no renovasaun Pasaporte, iha Diretór Jerál Servisu Rejistu Notariadu, Kolmera, Kuarta (03/01/2024). Imajen TATOLI/ Francisco Sony

DILI, 20 marsu 2024 (TATOLI) – Diresaun Jerál Servisu Rejistu Notariadu povizoriamente labele halo emisaun Passaporte ba públiku tanba mákina produsaun avariadu.

“Agora daudaun, impressora kaderneta Passaporte (IXLA) avaria no labele halo produsaun. Ami suspende atendimentu ba públiku to’o akizisaun mákina impressora tama iha tempu tuir mai”, hateten hosi komunikadu ne’ebé TATOLI asesu, iha kuarta ne’e.

Iha komunikadu ne’e mós sita katak dadus ne’ebé pendente maibé halo ona pagamentu no seidauk imprime Passaporte hamutuk 1.028 no iha ema hamutuk 2.800 mak hasai ona foto, maibé seidauk foti resivu.

“Tanba kestaun avaria ne’e mak emisaun ka fó sai Passaporte ne’e sei la tuir nia tempu determinadu, atu labele hamosu dezentendimentu no protestu barak liga ho direitu rekerente sira-nian mak hahú iha loron 22 Marsu 2024, ami taka provizóriu to’o mákina foun tama. Avizu ne’e abranje to’o iha munisÍpiu sira no RAEOA”,  hateten hosi komunikadu ne’e.

Rekorda fali katak Ministru Justisa Sergio Honai aprezenta ona preokupasaun ne’e ba reuniaun Konsellu Ministru atu permite hodi halo akizisaun ba mákina produsaun Passaporte rua ho valór osan millaun $2.

Konsellu Ministru deside aprova pedidu ne’e no autoriza Ministru Justisa atu kontrata Empreza Thales atu halo akizisaun ba mákina rua ba produsaun Passaporte.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!