iklan

HEADLINE, SEGURANSA

PNTL asegura joven 42 iha Portu Dili 

PNTL asegura joven 42 iha Portu Dili 

Komandu PNTL asegura estudante UNPAZ 20 inklui joven 20 IHA portu Dili. Foto Natalino Costa.

DILI, 21 marsu 2024 (TATOLI) – Komandante Polísia Nasionál Timor-Leste (PNTL) Munisípiu Dili Superintendente Xefe Polísia, Orlando Gomes, dehan Komandu PNTL Dili, daudaun ne’e, asegura hela estudante Universidade da Paz (UNPAZ) no grupu joven sira ho totál  42, entre hirak ne’e, iha feto rua. Atuasaun autoriade polisiál ne’e akontese iha Portu Dili tanba deskonfia atu halo asaun ba malu.

Kazu ne’e akontese iha tuku 06:00, ohin, bainhira estudante sira UNPAZ  fila hosi Oe-Cusse bainhira konklui estájiu. Sira mai Dili ho ró, bainhira estudante sira ne’e tún iha Portu Dili, iha estudante sira ne’e halo planu ona atu halo asaun atake hasoru joven sira, maibé asaun ne’e la susesu tanba servisu sekretu sira simu infomasaun no halo kedan intervensaun hodi asegura kedan estudante sira inklui gurpu joven iha área Portu Dili hodi lori mai Eskuadra Vera Cruz hodi submete ba prosesu investigasaun.

“Ita ohin asegura ema 42, hosi ema sira ne’e, iha estudante UNPAZ nian 20-resin no grupu joven. Ita asegura sira tanba ema sira ne’e atu halo asaun atake ba malu iha área Portu Dili”, Superintendente Xefe Polísia, Orlando Gomes hateten ba jornalista sira iha kna’ar fatin Komandu PNTL Dili Caicoli, kinta, ohin.

Komandu PNTL asegura estudante UNPAZ 20 inklui joven 20 IHA portu Dili. Foto Natalino Costa.

Nia esplika, estudante UNPAZ sira ne’e, antes ne’e iha ona problema entre sira ho sira, tanba tuir informasaun ne’ebé iha katak sira halo asaun provokativa iha mídia sosiál hodi sadik malu atu baku malu.

“Tuir informasaun ne’ebé iha katak estudante ho joven sira ne’e, antes ne’e sira ho sira iha ona problema, liuhosi rede sosiál, sira sadik malu atu baku malu ka asalta malu hanesan iha video balun ne’ebé ami iha katak estudante UNPAZ mak hateten imi hein kuandu ami fila hosi ami-nia fatin estájiu iha Oe-Cusse mak ita ba asalta malu de’it, tanba ne’e, ohin dadersan estudante sira ne’e ho ró fila hosi Oe-Cusse mai Dili bainhira to’o iha Portu Dili, entaun iha grupu joven balun mós hein iha ona fatin ne’ebá. Kuandu estudante sira ne’e tún hosi ró atu fila ba sira-nia uma idak-idak, entaun grupu joven ne’ebé iha ona fatin ne’ebá  atu halo asaun maibé la konsege tanba autoidade sira halo intervensaun kedan”, nia afirma.

Gomes hateten, iha prosesu investigasaun ne’e mak la hetan indísiu krime ruma, entaun polísia sei haruka fila estudante inklui joven sira ne’e ba uma.

“Maibé karik mak iha investigasaun ne’e mak estudante UNPAZ inklui joven sira iha indísiu ba krime entaun polísia sei koordena ho Ministériu Públiku para hasai mandadu hodi halo detensaun ba sira”, nia konklui.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!