DILI, 27 marsu 2024 (TATOLI) – Xefe Estadu, José Ramos Horta, husu ba Governu tau prioridade ba Universiade hotu iha Timor-Leste hodi hadi’a kualidade edukasaun no rekursu umanu.
“Ha’u ho maun boot Kay Rala Xanana Gusmão hasoru malu ho Universidade hotu iha Timor-Leste, rona ona sira nia preokupasaun, ami buka dalan hotu atu apoiu sira, maibé Governu mak servisu makas hodi haree ba asuntu sira ne’e,” Horta hatete ba jornalista sira iha Bairru-Pite Dili, kuarta ne’e.
Ho nune’e nia husu ba Ministériu Ensinu Superiór atu tau atensaun hodi apoiu universidade hotu iha Timor-Leste liuliu Universidade privadu sira.
“Governu tenke haree oinsá tulun universiade privadu sira no halo esforsu maka’as, maibé kontinua hasoru difikuldade, Governu tenke tau atensaun, aumenta osan ba iha Universidade Nasionál Timor-Lorosa’e (UNTL) atu nune’e bele fó espasu ba dosente sira hanorin ho di’ak sosa ekipamentu ne’ebé modernu, tanba setór edukasaun importante iha nasaun ne’e,” nia katak.
Tuir nia, Governu gasta osan barak selu asesór politiku sira kada ema kuaze rihun $3 to’o rihun $5, no lolos tau orsamentu barak ba edukasaun.
“Agora asesór polítiku sira iha Governu mak manán salariu boot, loloos osan boot tau ba iha edukasaun, liuliu haree kondisaun Universidade sira nian,” nia tenik.
Tuir dadus ne’ebé iha Universidade estatál no privadu iha Timor-Leste hamutuk 10-resin.
Notísia relevante: MESSK prioriza ba dezenvolvimentu institusionál no formasaun iha OJE 2024
Jornalista: Hortencio Sanchez
Editór: Florencio Miranda Ximenes
