MESSK prioriza ba dezenvolvimentu institusionál no formasaun iha OJE 2024
DILI, 04 novembru 2023 (TATOLI)—Ministériu Ensinu Superiór Siensia no Kultura (MESSK) prevee $ 9.132.072 iha proposta-lei Orsamentu Jerál Estadu (OJE) 2024 hodi fó prioridade ba programa rua hanesan funsionamentu no dezenvolvimentu instituisionál edukasaun formasaun.
“MESSK iha proposta Orsamentu Jerál Estadu (OJE) 2024 prevee $9.132.072 hodi aloka ba saláriu vensimentu $2.373.957, bens serbisu $1.491.115, transferénsia públika $5.150.000, kapitál menór $117.000 no kapitál dezenvolvimentu laiha,” refere dokumentu livru proposta OJE 2024 ne’ebé Agência Tatoli asesu, segunda ne’e.
Tuir dokumentu livru proposta OJE 2024 planu asaun anuál, MESSK prioriza dahuluk mak programa funsionamentu no dezenvolvimentu instituisionál ho ninia sub-programa haat no atividade 14.
Daruak mak programa edukasaun formasaun ho ninia sub-programa sistema jestaun no monitorizasaun estudante timoroan iha rai-li’ur ho nia atividade mak akompaña estudante timoroan iha rai-li’ur liuhosi kolokasaun adidu no asisténsia tékniku, elabora proposta atribuisaun anuál bolsa estudu ba dosente ensinu superiór no estudante hosi família kbiit laek no mós bolsu estudu baze méritu akadémiku.
Sub-programa sistema koordenasaun no garantia kualidade iha ensinu superiór ho ninia atividade koordena no jere programa iha ensinu superiór, kuríkulu ensinu superiór universitáriu no tékniku, dadus estatístiku ensinu superiór no siensia, funsionamentu komisaun koordenadora unidade no instituisaun superiór, implementasaun mekanizmu no promosaun kualidade sistema ensinu superiór.
Implementasaun prosesu anuál asesu no ingresu ensinu superiór, kriasaun institutu politékniku, monitorizasaun funsionamentu IES públiku no privada, revizaun no implementasaun sistema nasionál kualifikasaun Timor-Leste, selebrasaun loron nasionál ensinu superiór, promosaun atividade iha área siénsia no teknolójia, avaliasaun no rejistu kursu foun.
Entertantu, iha segunda (04 dezembru 2023), Ensinu Superiór Siensia no Kultura (MESSK) hala’o audiénsia públika ho komisaun G trata asuntu Edukasaun iha Parlamentu Nasionál (PN) hodi aprezenta proposta OJE 2024 ho ninia planu asaun anuál.
Jornalista : Nelson de Sousa
Editór : Cancio Ximenes
