DILI, 29 Marsu 2024 (TATOLI)– Polísia Nasionál Timor-Leste (PNTL), liuhosi Servisu Informasaun Polísia Naionál (SIPN) junta ho Servisu Informasaun Militár (SIM), sesta ne’e, asegura joven mane na’in-lima ne’ebé envolve krime jerál ba kazu foti subaemr motór iha Kapitál Dili.
Suspeitu hirak ne’e ekipa servisu kaptura iha fatin ne’ebé lahanesan ho kedas evidénsia motorizada hamutuk hitu kompostu hosi motór rua sobu rahun ona hodi monta fali ba motór lima seluk no motór balun sira sobu rahun hodi faan tutan ona ba ema seluk.
“Ekipa konjunta kaptura uluk suspeitu JTS alias ON iha area Bedois, hodi kontinua foti tan AES alias OG hamutuk ho JCMF alias AF iha area Matadouru ne’ebé sai mós hanesan sasin prinsipál tanba motorizada hirak ne’e para iha nia uma no ikus mai kaptura suspeitu prisipál ho naran AJ alias AMB iha área Manumeta Rai Hun inklui PCR alias AS iha área Aituri-Laran tanba sa’e hela motór ne’ebé nia foti subar,” refere nota ne’ebé Agência TATOLI asesu husi ekipa servisu sekreta, sesta ne’e.
Rekorda fali katak, suspeitu AES komete ona kazu sobu kioske, hodi foti ropa iha loja inklui foti mós ema nia animál ne’ebé nia inan rasik selu hotu ona.
Enkuantu suspeitu AJ alias AMB komete ona kazu foti subar osan, motór, telefone no-mós hadau telefone iha dalan públiku ne’ebé mak rejista ona iha bazededadus PNTL nian.
Entretantu evidénsia ne’ebe ekipa rekolla iha motorizada hamutuk hitu inklui telefone hamutuk tolu maka hanesan tuir mai ho espesifikasaun hanesan, Honda Beat kor metan ne’ebé sira pinta fali ba mutin no azúl ho númeru chasis : MH1JM9125PK796038, Honda Beat Karbu sira pinta ba kor mean-metan, númeru chasis : MH1JF5116AK126564, Beat kor metan númeru chasis MH1JM8127NK252793, Beat Street kor mutin metan, númeru chasis : MH1JFZ210JK376923, Beat Predator kor metan, númeru chasis : MH1JM9124PK838442, Beat Space kor metan númeru chasis : MH1JFA111DK176690, Beat Predator kor metan, númeru chasis: JM91E3043222, telefone marka REALME, kor roixu, OPPO 5S kor azúl no I-phone XR kor metan.
Hafoin ramata prosesu identifikasaun ekipa servisu halo kedas auto notísia hodi entrega suspeitu nain-rua hamutuk ho evidénsia ba Departamentu Investigasaun Kriminál Nasionál (DIKN), hodi halo prosesu investigasaun.
Daudaun ne’e suspeitu sira detein hela iha sela PNTL Dili durante oras 72 hafoin entrega ba primeiru interrogatóriu.
Notísia relevante: PNTL detein suspeitu ida ba kazu motór lakon
Jornalista: Hortencio Sanchez
Editór: Florencio Miranda Ximenes
