iklan

HEADLINE, SEGURANSA

PNTL ”Alerta” la tolera joven hemu tua iha espasu públiku

PNTL ”Alerta” la tolera joven hemu tua iha espasu públiku

Komandante Sup Xefi Munisípiu Dili, Orlando Gomes. Imajen Tatoli/Francisco Sony

DILI, 01 abríl 2024 (TATOLI) – Komandante (PNTL) Munisípiu Dili, Superintendente Xefe Polísia, Orlando Gomes, hateten Komandu PNTL sei la tolera joven halibur malu hodi hemu tua iha estrada públiku. Joven sira mak la kumpre ida-ne’e, PNTL sei  halo detensaun.

“Komandu Dili orienta ona ba membru sira katak sei la tolera ba ita-nia sidadaun sira ka ita-nia joven sira ne’ebé mak utiliza espasu públiku hanesan estrada ibun para konsumu alkohol, ne’e ami la tolera, kuandu ami hetan, ami sei kaptura hotu, tanba hosi buat sira ne’e mak halo provokasaun to’o problema mosu tanba ne’e mak estrada ibun kuandu joven sira uza hodi hemu tua mak ami la tolera, ami sei halo atuasaun”, Orlando Gomes hateten ba jornalista TATOLI iha kna’ar Caicoli, foin lais.

Komandante ne’e rekoñese katak situasaun kriminalidade hahú aas iha Dili tanba kauza hosi problema individu entre joven sira no ida seluk mak joven sira konsumu alkohol iha estrada ibun.

“Iha kestaun rua mak kontribui ba konfrontu iha fatin-fatin, primeiru ha’u hakarak hateten problema sira ne’ebé mak durante ne’e mosu tanba ida kauza hosi problema partikulár, no problema partikúlar daet ba organizasaun ka grupu, no segundu problema ne’ebé mosu katak joven sira konsumu alkohol iha fatin publiku, kuandu sira lanu ona sira komesa halo voice tún sae para kria provokasaun ba malu”, nia dehan.

“Tanba ida-ne’e mak ami identifika ona katak ami iha planu oinsá mak ami atu bele halo prevensaun ba krime sira ne’e, ba oin ne’e komandu orienta ona ba membru sira para hasae patrollamentu lao ain ba fatin sira risku ba konflitu atu asegura ba fatin sira ne’e hodi hamenus krime, ba oin ita lakohi koalia de’it mas ba oin ita sei kontinua nafatin kolabora komunidade sira para ita nafatin halo prevensaun ba krime sira ne’ebé mak mosu”, nia adianta.

Gomes hateten, PNTL identifika área Dom Aleixo mak sai zona risku ba konflitu tanba foin dadaun iha área Ai-Mutin joven sira hamosu konfrontu hodi rezulta uma no motór ida hetan estragu no iha Suku Madohi mosu konfrontu hodi rezulta uma komunidade nian ida rahun, tanba ne’e PNTL sei hasae volume patrollamentu iha área ida-ne’e atu prevene krime sira.

“Ita haree hosi observasaun no identifikasaun ne’ebé mak ita hetan mak parte Dom Aleixo mak sai área ba konflitu tanba Dom Aleixo ne’e ita haree foin dadaun iha Ai-Mutin, Akontese iha Madohi no Marconi ne’e sempre bebeik, tanba ne’e mak ita tau atensaun iha fatin ne’ebá, para ita halo patrollu iha oras 24. PNTL sei intensifika patrollamentu iha área ne’ebá kuandu haree konflitu mosu bebeik iha fatin ne’ebá mak ita sei halo postu ida iha ne’ebá para atu garante situasaun seguransa iha ne’ebá”, nia informa.

Komandante Munisípiu Dili ne’e fundamenta katak PNTL kontinua halo diálogu ho komunidade iha área Dom Aleixo nian atu joven sira bele kontribui ba pás no estabilidade.

“Komandu nafatin halo aprosimasaun ba ita-nia komunidade sira hodi garante situasaun seguransa”, nia dehan.

Iha sorin seluk, Komandante Interinu Unidade Espesiál Polísia (UEP), Superintendente Polísia, Damião Correia, akresenta UEP kontinua apoia Komandu PNTL Dili atu asegura Dili hosi situasaun kriminalidade ne’ebé mak mosu durante ne’e.

“Kona-ba situasaun kriminalidade iha Dili, Unidade Espesiál Polísia kontinua apoia Komandu PNTL Dili hodi asegura situasaun seguransa iha Dili liuliu ba fatin sira ne’ebé risku ba konflitu”, nia dehan.

Damião haktuir, Komandu Jerál PNTL Komisáriu Jerál Henrique da Costa orienta UEP atu garante seguransa iha Dili tanba dala barak mosu problema iha fatin sira hanesan Marconi no fatin sira seluk. Nune’e mak UEP promete sei apoiu totál Komandu PNTL hodi prevene konflitu iha área ne’ebé konsidera hanesan zona risku.

“Ha’u orienta ona ba membru sira katak tenke halo patrollu ba zona risku ba konflitu, kuandu membru halo patrollu mak sente kole, entaun labele mai iha unidade, maibé sira toba iha karreta laran de’it no sira seluk troka fali hodi fó seguransa iha fatin ne’e atu bele halo prevensaun ba konflitu”, nia afirma.

Nia husu ba OPS no servisu intelijénsia sira atu halo vijilásia másima iha bairro no suku.

“Sé de’it ka grupu balun ne’ebé iha indikasaun iha bairro ka iha suku mak halo problema no tur hamutuk iha dalan ibun hodi hemu tua, ami nia OPS no servisu intelijen sira, favór infoma mai atu polísia halo kapturasaun ba sira hodi entrega ba Komandu PNTL hodi halo prosesu investigasaun ba sira”, nia konklui.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!