iklan

HEADLINE, SEGURANSA

 Suspeitu na’in-haat na’ok motór kumpre prizaun preventiva

 Suspeitu na’in-haat na’ok motór kumpre prizaun preventiva

Portavós Komandu Jerál PNTL, Superintendente Polisia, António da Luz. Imajen /Tatoli

DILI, 01 abríl 2024 (TATOLI) – Portavós Komandu Jerál PNTL Superintendente Polísia António da Luz, hateten suspeitu na’in-haat ne’ebé mak foti subar motór iha kapita Dili kumpre ona prizaun preventiva.

“Ita-nia suspeitu na’in-lima ne’ebé mak foin daudaun polisía detein tanba envolve kazu na’ok motór iha kapitál Dili, iha suspeitu nain lima ne’e iha suspeitu na’in-haat mak Tribunál deside aplika prizaun preventiva no agora suspeitu na’in-haat ne’e kumpre ona prizaun preventiva iha prizaun Becora, enkuantu suspeitu nain-ida mak Tribunál aplika medida koasaun Termu Identidade Rezidénsia (TIR), tanba nia minoridade, tanba suspeitu ne’e foin atinje ho idade16. Tribunál deside aplika TIR ba nia”, Superintendente Polísia António da Luz hateten ba jornalista sira iha Komandu Jerál PNTL, Segunda, ohin.

Rekorda fali katak iha kinta (28/3) foin lalais ne’e Polísia Nasionál Timor-Leste (PNTL), liuhosi Servisu Informasaun Polísia Nasionál (SIPN) junta ho Servisu Informasaun Militár (SIM), asegura joven mane na’in-lima ne’ebé envolve krime jerál ba kazu na’ok motór iha Kapitál Dili.

Suspeitu hirak ne’e ekipa servisu detein iha fatin ne’ebé lahanesan ho kedas evidénsia motorizada hamutuk hitu kompostu hosi motór rua sobu rahun ona hodi monta fali ba motór lima seluk no motór balun sira sobu rahun hodi fan tutan ona ba ema seluk.

Ekipa konjunta kaptura uluk suspeitu JTS alias ON iha área Bedois, hodi kontinua foti tan AES alias OG hamutuk ho JCMF alias AF iha área Matadouru ne’ebé sai mós hanesan sasin prinsipál tanba motorizada hirak ne’e para iha nia uma no ikus mai kaptura suspeitu prinsipál ho naran AJ alias AMB iha área Manumeta Rai Hun inklui PCR alias AS iha área Aituri Laran tanba sa’e hela motór na’ok.

Suspeitu AES komete ona kazu sobu kioské, na’ok ropa iha loja inklui na’ok ema nia animál ne’ebe nia inan rasik selu hotu ona. Enkuantu suspeitu AJ alias AMB komete ona kazu na’ok osan, na’ok motór, na’ok telfone no-mós hadau telefone iha dalan públiku ne’ebé mak rejista ona iha baze dadus PNTL nian.

Evidénsia ne’ebé ekipa rekolla mak iha motorizada hamutuk hitu inklui telephone tolu. Tuir mai ho espesifikasaun hanesan, Honda Beat kor metan ne’ebé sira pinta fali ba mutin azul, númeru chasis : MH1JM9125PK796038, Honda Beat Karbu sira pinta ba kor mean metan, númeru chasis : MH1JF5116AK126564, Beat kor metan númeru chasis MH1JM8127NK252793, Beat Street kor mutin metan, númeru chasis : MH1JFZ210JK376923, Beat Predatór kor metan, númeru chasis : MH1JM9124PK838442, Beat Space kor metan númeru chasis : MH1JFA111DK176690, Beat Predatór kor metan, númeru chasis: JM91E3043222, telefone marka REALME, kor roixu, OPPO 5S kor azul no I-phone XR kor metan.

Hafoin remata prosesu identifikasaun ekipa servisu halo kedas auto entrega suspeitu na’in-rua hamutuk ho evidénsia ba Departamentu Investigasaun Kriminál Nasionál (DIKN), hodi halo prosesu investigasaun

Jornalista: Natalino Costa

Editór : Zezito Silva

 

iklan
iklan

Leave a Reply

iklan
error: Content is protected !!