Komandu PNTL-F-FDTL diskute seguransa ba vizita Amu Papa Francisco

DILI, 02 abríl 2024 (TATOLI) – Komandante Jerál Polísia Nasionál Timor-Leste (PNTL) Komisáriu Jerál Polísia, Henrique da Costa, dehan Komandu PNTL hamutuk ho Komandu Falintil-Forsa Defeza Timor-Leste (F-FDTL), hahú diskute planu operasaun seguransa konjunta hodi simu vizita Amu Papa Francisco mai Timor-Leste iha fulan-Agusto, tinan ne’e.

”Ohin ita halo enkontru badak ida, entre komandante jerál ho segundu komandante jerál no hamutuk ho ita-nia Jenerál F-FDTL atu diskute preparasaun seguransa liga ho vizita Amu Papa nian. Iha enkontru ida-ne’e komandu rua koalia kona-ba planu operasaun seguransa oinsá ba oin ita hamutuk para bele asegura seguransa ba ita-nia vizita Santo Padre bele di’ak“,Henrique da Costa ba jornalista sira hafoin remata enkontru ho Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál, Domingos Raul Falur Rate Laek iha Kuartel Jerál PNTL Caicoli, tersa ne’e.

Nia haktuir, Governu nia orientasaun mak PNTL no F-FDTL tenke hamutuk hodi fó seguransa ba vizita Papa mai Timor-Leste.

“Ita hetan orientasaun balun hosi Governu liuhosi Ministériu Interiór katak PNTL no F-FDTL tenke halo seguransa konjunta hodi asegura vizita Amo Papa nian mai Timor-Leste, tanba ne’e komandu rua diskute asuntu ida-ne’e oinsá hamutuk hodi halo planu operasaun hodi fó seguransa. Ita seidauk iha diretiva konjunta ba institituisaun rua ne’e, maibé kuandu diretiva Governu sai katak PNTL-F-DTL hamutuk halo seguransa mak ita prontu asegura diretiva konjuntu ida-ne’e, hodi nune’e polísia ho forsa bele asegura vizita Amu Papa ninian no mós ba atividade sira seluk”, nia adianta.

Iha fatin hanesan, Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raul Falur Rate Laek, dehan F-FDTL no PNTL preparadu atu fó seguransa ba vizita Amu Papa nia mai Timor-Leste.

“Ohin ami Jenerál sira hasoru malu ne’e la’os ko’alia kona-ba feto-san nian no la’os ko’alia kona-ba partikulár, ne’e ko’alia kona-ba asuntu defeza no seguransa nian. Asuntu ne’ebé ami koalia mak atu halo kooperasaun atu asegura diretiva polítika mai hosi Governu kona-ba F-FDTL no PNTL”, nia informa.

Nia dehan, F-FDTL no PNTL sempre prontu tulun malu iha kualker momentu saida de’it.

“Ami sempre preparadu hodi kumpre misaun, ami tenke fó seguransa másima hodi foti timór nia oin ida-ne’e. Tanba vizita Santo Padre nian ne’e foin primeira véz, tanba ne’e mak ita hotu tenke ajuda malu para apoiu instituisaun rua, tanba susesu ne’e la’ós ba PNTL ho F-FDTL de’it maibé susesu ba nasaun”, nia dehan.

Jornalista: Natalino Costa

Editór : Zezito Silva