iklan

JUSTISA, HEADLINE

PDHJ prezide reuniaun SEANF no diskute asuntu direitu umanu

PDHJ prezide reuniaun SEANF no diskute asuntu direitu umanu

Ekipa Provedória Direitu Humanu no Justisa (PDHJ), hala'o enkontru ho delegasaun hosi South-East Asia National Human Rights Instituitional Forum (SEANF), iha salaun Hotel Ramelau Dili, kuarta (03/04). Imajen Tatoli/Francisco Sony

DILI, 03 abríl 2024 (TATOLI) – Prevedoria Direitu Humanu no Justisa (PDHJ) Timor-Leste sai uma-na’in no prezide reuniaun dahuluk ba forúm instituisaun kona-ba direitu umanu iha rejiaun Sudeste Aziátiku ka bolu The Southeast Asia National Human Rights Institution Forum (SEANF).

Reuniaun ida-ne’e efetua iha Dili, Timor-Leste no lidera hosi Prevedór Direitu Humanu no Justisa, Virgílio Guterres. Tema ba reuniaun iha tinan ne’e mak “Human rigth for all and especially in southeast Asian respect, protected and enyed equality by all”.

Prevedór Direitu Humanu Justisa, Virgílio Guterres, hateten PDHJ nu’udar nasaun membru SEANF no tinan ne’e sai prezidensiál ba reuniaun forúm SEANF iha Timor-Leste.

“Reuniaun The Southeast  Asia National Human Rigths Intitutions Forum nu’udar reuniaun anúal, PDHJ hola parte hanesan nasaun membru no reuniaun dahuluk SEANF, tinan ne’e realiza iha Dili no Prevedoria Direitu Humanu no Justisa mak sai uma-nain hodi prezide reuniaun ida-ne’e durante loron rua, hahú hosi kuarta (3/4) ohin no sei remata iha aban”, Virgílio Guterres hateten ba jornalista hafoin prezide reuniaun dahuluk iha Hotel Ramelau, kuarta ne’e.

Nia esplika, reuniaun dahuluk ne’e koalia liu kona-ba kestaun direitu umanu, oinsá nasaun sira iha rejiaun Sudeste Aziátiku bele tau importánsia ba direitu umanu, problema tráfiku umanu inklui ema halo pasajen ilegál iha fronteira inklui kestaun azíliu polítiku iha Malázia.

Tuir nia, kestaun sira ne’e parte ida hosi direitu ema-nian tanba ne’e nasaun membru SEANF atu tau konsiderasaun hodi husu ba nasaun ASEAN atu tau atensaun mós ba asuntu sira-ne’e.

Ezemplu; Timor-Leste ho Indonézia sempre mosu problema sidadaun nasaun rua ne’ebé halo pasajen ilegál iha liña fronteira, dala ruma polísia halo detensaun ba sira, maibé haree hosi aspeitu direitu umanu ne’ebé liga ba sosiu kulturál, relasaun família no sósiu ekonómiku mak obriga mosu problema sira hanesan ne’e.

“Tanba ne’e mak ohin, ami koalia ho KOMNASHAM Indonézia atu haree asuntu ida-ne’e. No uluk mós ita-nia Governu halo ona akordu ho Governu Indonézia Border Pass hodi fasilita sidadaun rua bele halo movimentu iha liña fronteira, iha enkontru ne’e ami husu Governu bele reativa fila fali Border Pass atu nune’e bele fasilita sidadaun sira ba mai iha liña fronteira ho livre”, nia adianta.

Nune’e mós, asuntu tráfiku umanu, PDHJ husu ba membru SEANF atu tau importánsia ba tráfiku umanu iha rejiaun Sudeste Aziátiku oinsá nasaun sira iha ASEAN atu hamutuk prevene asuntu ida-ne’e. Tanba kazu sempre akontese iha Timor-Leste no vítima barak mak oras ne’e hela ona iha uma mahon. No problema ne’ebé PDHJ koloka iha reuniaun ne’e mak asuntu torturasaun ema iha prizaun, tanba dala barak ema dadur sira hetan torturasaun no iha enkontru ne’e.

“Ho nune’e, PDHJ husu ba nasaun membru sira atu tau kestaun ne’e oinsá atu halo prevensaun ba ida-ne’e”, Virgílio Guterres afirma.

Iha reniaun ne’e, PDHJ mós husu ba nasaun membru SEANF hanesan Indonézia, Malazia, Filipina, Thalándia no Myamar atu kontinua koopera ho PDHJ atu hamutuk rezolve violasaun  direitu umanu.

“Ho KOMNAS HAM Indonézia, ohin liuhosi reuniaun ne’e, ita husu para sira kontinua apoiu ita hodi buka tuir ema lakon, liuliu ema sira ne’ebé lakon iha funu hahú hosi 1974 to’o 1999. Durante ne’e ita-nia kooperasaun ho sira, ita konsege halibur fila fali sira ne’ebé lakon iha funu hodi entrega ba nia família sira”, nia haktuir.

Iha fatin hanesan, Sekretáriu Jerál KOMNAS HAM Indonézia, Henry Silka Ina, dehan reuniaun ne’e importante ba nasaun membru sira atu ajuda malu hodi solusiona problema direitu umanu iha rejiaun Sudeste Aziátiku.

“Asuntu direitu umanu ne’e asuntu universál, maibé ho reuniaun ida-ne’e ita sei servisu hamutuk hodi prevene asuntu sira ne’ebé liga ba direitu umanu nian liuliu nasaun sira iha Sudeste Aziátiku”, nia afirma.

The Southeast Asia Nation Human Rigths  Intitutions Forum harii iha 2007 ho nasaun membru neen, kompostu hosi Prevedoria Direitu Humanu Justisa (PDHJ) Timor-Leste, Komisi Nasionál Hak Asasi (Komnas Ham) Indonézia, Komisaun Direitu Umanu Malázia, Komisaun Direitu Umanu Filipina, Thalándia no Myanmar .

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!