BOBONARO, 03 abríl 2024 (TATOLI) – Diresaun Servisu Munisipál Saúde, Munisípiu Bobonaro, hahú hosi fulan-janeiru to’o abríl 2024 rejista kazu moras dengue hamutuk 122 no hosi númeru ne’e óbitu na’in-tolu.
Tuir dadus epidimoljía hosi Ministeriu Saúde,iha fulan janeiru agora hatudu Katak munisípiu Bobonaro okupa númeru daruak rejista kazu Dengue a’as liu iha Timor-Leste hafoin munisípiu Dili.
Diretór Servisu Saúde Munisipál Bobonaro,Gíl Bernardo Vicente,hateten Surtu ne’e evolui maka’as liu iha postu administrativu Maliana.
Notísia relevante: SSK Maliana rejista kazu Dengue iha suku haat
“Ita iha kazu dengue hamutuk 122. Hosi númeru ne’e mate na’in-tolu ona, kazu hirak-ne’e rejista barak liu iha Maliana,” nia informa ba jornalista sira iha Maliana, kuarta ne’e.
Relasiona ho kazu ne’ebé kontinua rejista aas, Servisu Saúde Munisipál Bobonaro mos halo ona fumigasaun, fahe abate iha área risku ba surtu ne’e.
“Ha’u husu komunidade sira atu halo limpeza iha idak-idak nia uma oin no ninin, labarik sira halimar tenke tau faru liman naruk, toba uza muskateiru no tau autan atubele prevene-aan hosi moras ne’e,” Diretor Gíl Bernardo hateten.
Notísia relevante: Saúde Bobonaro rejista óbitu dengue rua
Jornalista: Sérgio da Cruz
Editór: Evaristo Soares Martins
