BOBONARO, 16 fevereiru 2024 (TATOLI) – Diresaun Servisu Munisipál Saúde Bobonaro, iha fulan-fevereiru ne’e rejista kazu óbitu dengue na’in-rua ho idade tinan lima ba leten hosi postu administrativu Maliana no postu administrativu Cailaco.
Diretór Servisu Munisipál Saúde, Autoridade Munisípiu Bobonaro, Gil Bernardo Vicente, hateten kazu komulativu hamutuk 64 hosi totál na’in-rua mak mate iha Dili, hafoin halo transferénsia hosi Ospitál Referál Maliana.
Kazu obitu ne’e ida akontese iha loron 06 no ida akontese iha loron 15 fulan-fevereiru ne’e.
“Ita iha kazu dengue mate na’in-rua, ami nafatin husu ba komunidade sira atubele kuidadu-aan no hamoos ambiente atu núne’e ita bele hado’ok-aan hosi susuk Aedes Aegipty,” nia informa ba Jornalista sira iha salaun CVTL, Maliana, sesta ne’e.
Enkuantu foin lalais ne’e Servisu Saúde Munisípiu Bobonaro halo ona fumigasaun no abate ba komunidade iha aldeia Rokon, suku Odomau no sei kotinua ba iha área risku sira hodi bele prevene susuk labele husik tolun iha komunidade nia leet.
Notísia relevante: Prevene dengue, Saúde Bobonaro halo fomigasaun ba aldeia Manu-Aman
Jornalista : Sérgio da Cruz
Editór : Evaristo Soares Martins
