Baucau sei implementa projetu reabilitasaun estrada rurál ho kilómetru 12
BAUCAU, 05 abríl 2024 (TATOLI) – Munisípiu Baucau tinan ne’e sei implementa projeitu reabilitasaun estrada rurál hamutuk pakote rua ho distánsia kilómetru 12.
Diretór Servisu Munisipál Obra Públika Baucau, Agostinho Ximenes, esplika, projetu reabilitasaun estrada rurál ne’e sei implementa iha postu administrativu rua hanesan Baucau Vila iha suku Samalari no postu Laga iha suku Sagadate.
“Hosi área Buibau too Samalari, postu Baucau Vila nian hamutuk kilómetru 10 no kilometru rua iha suku Sagadate, postu Laga,” Diretór Servisu Munisipál Obra Públika hateten iha Vila Nova, sesta ne’e.
Projetu pakote rua refere iha ona faze aprovizionamentu no sei kontinua hetan verifikasaun hosi ekipa tékniku hosi Ministériu Obra Públika (MOP) antes implementa iha tinan ne’e.
Bainhira implementa, projetu refere sei halo liuhosi maneira iha rai tetuk ho tipu gravelteit ne’ebé uza materiál lokál hanesan rai henek britas, enkuantu iha parte xuvida sira sei fui sementu nune’e dura liuliu iha tempu udan.
“Xuvida ita tenke tau simentu, tanba udan ne’e bele estraga lalais, ita bele uza ba tempu naruk oituan, rai tetuk ita uza gravelteit,” Agostinho Ximenes akresenta.
Servisu Munisipál Obra Públika Baucau husu autoridade suku no komunidade atu kontribui hanesan koopera bainhira kompañia hahú serbisu iha terrenu tanba bainhira remata sei fasilita komunidade transporta produtu ba merkadu.
Projetu reabilitasaun estrada rurál pakote rua tinan-2024 iha munisípiu Baucau tuir planu sei responsabiliza hosi kompañia lokál ho kustu orsamentu hamutuk millaun rua.
Jornalista : Natalino Belo
Editór : Evaristo Soares Martins
