iklan

HEADLINE, SEGURANSA

Empreza Sainhos halo manutensaun semáforu 10 iha Díli

Empreza Sainhos halo manutensaun semáforu 10 iha Díli

Semaforu. Foto/Google.

DILI, 05 abríl 2024 (TATOLI) – Diretora Nasionál Transporte Terrestre (DNTT), Maria Antónia, subliña Empreza Sainhos Uni Pessoál Lda hahú halo manutensaun ba semáforu 10 iha kapitál Dili ne’ebé ladún funsiona ho di’ak.

“Ita iha lampu merah iha Dili ne’e hamutuk 12, durante ne’e rua mak aat totál no la funsiona ona maibé iha10 mak funsiona maibé dala ruma mós funsiona ladún di’ak no kadavés avaria hodi fó impaktu ba sirkulasaun movimentu transporte. Tanba ne’e hosi DNTT haruka ona Empreza Sainhos Unipessoal Lda hahú halo ona manutensaun ba lampu merah 10 iha Dili laran no manutensaun ne’e lao hela no semáforu iha fatin balun funsiona ho di’ak ona no balun empreza kontinua halo manutensaun”, Maria Antónia hateten ba TATOLI  iha kna’ar fatin Balide.

Nia dehan, Empreza Sainhos Unipessoal Lda mak durante ne’e sai manan na’in hodi halo manutensaun ba semáforu sira iha Dili laran.

“Kuandu ita-nia lampu merah sira ne’e mak avaria, entaun sira tún kedan ba terenu hodi halo kedan identifikasaun hodi haree aat iha parte ne’ebé, sira rezolve kedan no durante sira halo hanesan ne’e”, nia adianta.

Maria Antónia rekoñese semáforu iha Dili laran, iha fatin rua mak durante ne’e avaria totál no DNTT seidauk bele halo manutensaun tanba kustu ba manutensaun semáforu ne’e bo’ot tanba ne’e Diresaun Nasionál Transporte Terrestre sei tau planu orsamentu ba tinan oin hodi bele rezolve asuntu ida-ne’e.

“Durante ne’e lampu merah iha diresaun Hospitál Nasionál Guidu Valadares no diresaun Bemori nia tún ne’e mak avaria totál no ita seidauk bele halo manutensaun tanba orsamentu ba DNTT tinan ne’e só responde ba nesesidade instituisaun ninian. Maibé ba semáforu rua ita tau iha planu orsamentu tinan oin, nune’e bele halo manutensaun ba semáforu rua ne’e atu bele funsiona fila fali”, nia konklui.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!