Estrada urbana Baucau Vila iha faze revizaun dezeñu
BAUCAU, 05 abríl 2024 (TATOLI) – Prosesu planu ba reabilitasaun estrada urbana iha munisípiu Baucau iha ona faze revizaun dezeñu no tuir planu sei loke konkursu públiku iha tinan 2024.
Diretór Servisu Munisipál Obra Públika Baucau, Agostinho Ximenes, esplika, parte munisípiu hamutuk ho diresaun nasionál kontrolu estrada no ponte Ministériu Obra Públika halo ona estudu, mapeamentu no kontinua ona iha faze estudu revizaun dezeñu ho totál kilómetru 29.
“Tuir planu iha tinan-ne’e, maibé sei halo revizaun ba dezeñu posibilidade bele dada tempu,” Diretór Servisu Munisipál Obra Públika informa ba Agência TATOLI iha Vila Nova, sesta ne’e.
Prosesu naruk tanba dezeñu hotu tenke detallu inklui fatór sosiál hanesan mosu impedementu inklui halo indemnizasaun ba komunidade sira-ne’ebé afetadu ba prosesu reabilitasaun projetu refereda.
Parte Obra Públika Baucau prontu kolabora ho nasionál tanba estrada urbana iha Baucau presiza duni halo reabilitasaun maibé prosesu hotu responsável hosi nasionál nune’e parte munisípiu kontinua hein no akompaña.
“Proseu sei naruk, bainhira finaliza ona revizaun dezeñu detalladu, ami iha munisípiu prontu kolabora halo liña koordenasaun,” Agostinho Ximenes akresenta.
Iha tinan 2014 governu halo ona reabilitasaun estrada diresaun Bugaite ba rotunda Vila Nova, maibé kontinua estragus tanba cor de’it simentu inklui diresaun rotunda Vila Nova ba Nagardjo kilómetru 3.5 no Tirilolo to’o Buruma ho distánsia kilómetru 6 ne’ebé kondisaun atuál kategoria grave.
Alende ne’e, diresaun hosi Vila Nova to’o Vila Antiga no Nagardjo ba Vila Antiga ho totál kilómetru 19.5 ne’ebé mak liuhosi orsamentu mão de obra kada tinan halo manutensaun maibé sempre estraga hikas tanba fatór iklima hanesan udan no seluk tan.
Notísia relevante: Baucau sei implementa projetu reabilitasaun estrada rurál ho kilómetru 12
Jornalista : Natalino Belo
Editór : Evaristo Soares Martins
