Governu inaugura irrigasaun iha Fatulia
BAUCAU, 04 abríl 2024 (TATOLI) – Governu liuhosi Ministériu Agrikultura, Pekuária, Peska no Florestra (MAPPF) hamutuk ho parseiru dezenvolvimentu UNDP inklui autoridade administrasaun munisipál Baucau, kinta ne’e, inaugura irrigasaun iha área Bahadato, suku Fatulia, postu Venilale.
Irrigasaun referidu hala’o obra hosi kompañia lokál Ideal unipesóal.lda ho durasaun kontratu tinan-ida ne’ebé finansia hosi UNDP ho totál orsamentu hamutuk $61,174.00 ne’ebé kobre metru 415 no benefísia ba komunidade agrikultórbhamutuk uma-kain 157.
“Ami mai iha inaugura irrigasaun ne’e apoiu hosi UNDP hodi fó importánsia ba setór agrikultura, liuliu iha área Bahadato nian,” Ministru Agrikultura, Pekuaria, Peska no Floresta, Marcos da Cruz hateten iha Bahadato, kinta ne’e.
Irrigasaun referidu sei fornese bee ba natar ektare 200-resin ne’ebé tinan naruk komunidade Fatulia abandona tanba problema infraestrutura nune’e bele funsiona hikas.
Alende ne’e serimónia ne’e, kuda mós ai-oan iha área irrigasaun hodi proteje bee matan relasiona ho mudansa klimátika ne’ebé akontese liuliu rai-halai.
“Ohin mai la’ós inaugura de’it irrigasaun, maibé ita mós kuda ai-oan hodi fó benefísiu hodi proteje ita-nia rai no bee matan,” nia hateten.
Ai-oan ne’ebé kuda iha área Bahadato hamutuk 20.217 ne’ebé kuda rai ektare 15 kompostu ai gamal, mahoni, aifao, sabraka, kulujaka, nuu no seluk tan.
Prezidente Autoridade Munisipiu (PAM) Baucau, Veneranda Eurico Marques Lemos, agradese ba UNDP ne’ebé apoia konstrui irrigasaun iha Bahadato liuliu fasilita agrikultór sira reativa fali natar ne’ebé abandona tinan naruk.
“Ita inaugura ona, entaun ida-ne’e mak importánsia hosi parseiru dezenvolvimentu sira,” Veneranda Lemos hateten.
Jornalista : Natalino Belo
Editór : Evaristo Soares Martins
