DILI, 05 abríl 2024 (TATOLI)–Ministériu Administrasaun Estatál (MAE), sesta ne’e, realiza semináriu ho tema ‘Haforte relasaun saudável no promove efetividade funsaun públika iha Ministériu Administrasaun Estatál.’
Ministru Administrasaun Estatál, Tomás do Rosário Cabral, hateten, objetivu husi atividade ne’e maka atu konvida membru Governu sira hanesan Sekretária Estadu Igualdade no seluk tan atubele fahe esperiénsia no enkoraja funsionáriu husi kargu diresaun no xefia hotu iha MAE atu armoniza relasaun saudável iha família no serbisu fatin.
“Semináriu ne’ebé ita hala’o ne’e atu hatan ba preokupasaun Prezidente Repúblika kona-ba reprezentasaun femenina iha serbisu funsaun públika Estadu nian tenke iha prezensa mínimu 3%, entaun atividade ohin ne’e ko’alia kona-ba asuntu organizasaun jéneru ninian, ne’ebé atu reforsa partisipasaun feto ho kualidade iha governasaun,” Ministru relata iha salaun Delta Nova.
MAE rasik iha dadus kona-ba feto serbisu iha instituisaun referidu barak, hahú husi diretora jerál, diretora nasionál, xefe departamentu, inklui munisípiu sira hanesan feto na’in-10 sai sekretáriu munisipál feto rua ba autoridade munisípál.
Notísia relevante : SEII espera partisipasaun feto iha eleisaun xefe suku bele atinje 10%
Iha fatin hanesan, Sekretária Estadu Igualidade (SEI), Elvina de Sousa Carvalho, hateten, prezensa instituisaun ne’e iha semináriu maka atu fortifika feto sira iha serbisu parte administrasaun nian.
“Ha’u-nia prezensa ohin ne’e atu fahe esperiénsia serbisu SEI relasiona ho relasaun saudável hodi bele asegura funsionamentu funsaun públika, ita hatene katak funsaun públika mak serbisu ba mákina Estadu hodi bele asegura efetividade serbisu funsaun públiku no sira-nia papél importante tebes atu asegura funsionamentu serbisu,” nia akresenta.
Kona-ba serbisu funsaun públika iha mós fatór importante sira hanesan motivasaun no barreira, hanesan funsionáriu públiku sira hetan problema ne’ebé afeta mós ba efetividade serbisu.
“Ohin ita mai fahe hanoin ka serbisu SEI nian, tanba ita mós serbisu relasaun saudável iha família no sosiedade, fahe serbisu hanesan, tantu feto no mane ne’ebé konsidera balansu jéneru iha família,” membru Governu tanik.
Nia konsidera, semináriu ne’e importante tebes tanba funsionáriu kargu xefia sira ida-idak lori nia espoza mai partisipa semináriu hodi hasa’e koñesimentu parseiru sira-nia serbisu funsaun públiku hodi bele apoiu di’ak liután sira-nia parseiru sira hanesan funsionáriu públiku.
“SEI rasik daudaun sei rekolla hela dadus feto iha mak serbisu iha funsaun públiku maibé tuir SEI nia haree feto sira ne’ebé kaer kargu xefia iha instituisaun Estadu, sira hatudu duni prestasaun serbisu no kualidade ne’ebé di’ak bazeia ba méritu esperiénsia ne’ebé sira iha hatudu duni. Nune’e SEI ba oin nafatin halo advokasia bele nafatin hasa’e númeru partisipasaun feto iha funsaun públiku no kargu xefia sira hodi kontribui ba mudansa,” nia salienta.
Jornalista : Arminda Fonseca
Editora : Julia Chatarina
