iklan

MUNISÍPIU

Masakre Liquiça (I): “Ha’u-nia kakorok hetan taa, milísia tenta halo mate ha’u”

Masakre Liquiça (I): “Ha’u-nia kakorok hetan taa, milísia tenta halo mate ha’u”

José Nunes Serão, Sobrevivente Masakre Liquiça, imajen/ espesiál

Bainhira ha’u-nia kakorok hetan ona taa, ha’u halai sai. Liu ona metru 100, iha tan grupu milísia nian ida tenta atu halo mate ha’u maibé la konsege tanba ha’u halai tama tiha ba Eis-administradór Postu Liquiça nia uma; Sr. Agostinho Correia, matebian ona. Nia mak salva ha’u

 

LIQUIÇA, 07 abríl 2024 (TATOLI) –Tinan-tinan, loron 06 abríl, nu’udar loron istóriku, loron reflesaun, hodi hanoin tuir momentu sangrante (raan), iha istória luta timoroan sira nian ba ukun rasik aan. Loron ne’e, lori hikas timoroan sira memoriza “Masakre Liquiça” ka “Masakre igreja São João de Brito Liquiça, ne’ebé kauza timoroan sira mate, terus no susar oioin.

Tanba ne’e, atu istória no memória sira-ne’e labele haluha no lakon, Agência TATOLI, liuhusi jornalista Hortêncio Sanches, entrevista ho vítima no sobrevivente ida, José Nunes Serão, iha Salaun Tokodede Centre Liquiça, horseik.

Tuirmai vítima no sobrevivente ne’e konta nia istória:

Ami lakohi halai sai husi igreja tanba ami-sente igreja mak fatin seguru ona ba ami, maibé ikus mosu oinseluk. Milisia sira mai obriga atu lori sai ami ba oho, maibé maluk barak iha igreja ne’e la-fó, Amu Rafael dos Santos mós la fó ami sai. Ami mós hein de’it saida mak atu akontese, ikus ami fakar duni raan iha fatin sagradu ne’e.

Akontese iha 06 abríl iha tuku 12:00 meiudia, akontese ne’e halo husi Milísia Besi Merah Putih ne’ebé akompaña hosi Militar Indonézia. Sira tenta atu halo ataka ba sidadaun sira hela iha rezidénsia Parokia Liquiça nian iha 05 abríl maibé la konsege, entaun ataka fali iha 06 abríl.

Ami halai ba hela iha Igreja Liquiça maibé iha rezidénsia Amu Parókia ninian, iha tempu ne’ebá Amu Rafael mak hanesan Padre Parokia Liquiça. Ami halai ba igreja tanba situasaun husi Besih Merah Putih manas tebes.

Ami tama iha ne’ebá hanesan refujiadu, la’ós ami Liquiça vila de’it maibé maluk balun husi Maubara, Liquiça no Bazartete. Ema hotu halai ba igreja ne’e objetivu ida de’it atu hetan protesaun maibé ikus mosu oinseluk.

Antes milísia sira atu tama ami hatene ona, tanba Milísia sira hasoru malu ona iha fatin-fatin iha Liquiça laran, sira ne’e lidera hosi Eurico Guterres.

Eurico Guterres antes ne’e mai halo negosiasaun ho Amu Pároku Pe. Rafael atu hasai ema sira ne’e husi rezidénsia tanba sira deskonfia ami hirak iha igreja-laran ne’e mesak apoiu ba Ukun Rasik Aan.

Bainhira sira ko’alia hela, ha’u rona Pe. Rafael dehan, “Povu sira tama ona iha ha’u-nia arredór, responsabilidade ha’u-nian. Laiha ida mak atu mai hasai sira”. Entaun, sira ne’ebé grupu husi Eurico Guterres ne’e fila de’it.

Entaun Eurico ho nia grupu fila hasai hela liafuan ida ba Pe. Rafael dehan, “Se sira la sai ona hein de’it saida mak atu akontese ba sira iha igreja ne’e”.

Bainhira sira fila tiha, militar Indonézia sira tiru ba mai hale’u igreja, halo nune’e para ami ta’uk nune’e ami bele sai. Entaun, liu de’it minutu 15 ba oras tuku 12:00, milísia sira mai falun oin-metin, balun la falun oin, matan mean hotu, kesi bandeira Merah putih, kaer ho kilat rakitan, balun ho samurai, diman, katana, rama no seluktan halai tama mai igreja no rezidénsia amu nian hodi taa no sona ami. Militar Indonézia nian akompaña husi kotuk.

Bainhira sira tama asaltu ami, ema barak hakilar rende…rende… rende… maibé sira la importa. Ha’u konsege roma milísia balun ko’alia nune’e, “Ami laiha eskapasaun ba imi. Ami halo imi mate mohu iha fatin ne’e”.

Ami laiha ona kbiit. Ami hein de’it saida mak atu akontese, feto barak mak partus hela iha ne’ebá. Maibé, sira oho labarik ho inan hotu, iha mana na’in rua mak partus iha ne’ebá kous de’it labarik halai, to’o ohin loron sira sei moris hela. Sira-nia oan feto rua. Sira hasai hotu naran “Bi-funu”.

Ha’u heree ba situasaun labele ona, entaun ha’u tenta haksoit sai husi janela mak milísia sira lori samurai taa iha ha’u-nia kakorok.

Maibé ho grasa Maromak nian ha’u konsege la’o nafatin sa’e de’it mate sira-nia leten, tanba maluk barak mak sira oho, iha haris-fatin, sintina, uma sorin-sorin tanba ema sira milísia oho ne’e maioria estrutura klandestina nian.

Bainhira ha’u-nia kakorok hetan ona taa, ha’u halai sai. Liu ona metru 100 iha tan grupu milísia nian ida tenta atu halo mate ha’u, maibé la konsege tanba ha’u halai tama tiha ba Eis-administradór Postu Liquiça nia uma; Sr. Agostinho Correia, matebian ona. Nia uma. nia mak salva ha’u.

Bainhira ha’u halai tama ba Sra. Ona Pereira, Maun Tony Pereira nia feton, nia mak guarda ha’u. Nia mak suku ha’u-nia kakorok depois lori ha’u ba ospitál hodi halo tratamentu.

Bainhira tratamentu hotu tiha, kalan milísia sira tenta nafatin ba iha Ospitál atu oho ha’u. Ha’u rona Sr. Ida naran Tony, nia Tentara Indonézia nian hatete ba ha’u “Sorte, Besih Merah mak taa ó, ha’u mak taa ó, ó la moris”. Maibé, Maromak ne’e boot to’o ohin loron ha’u sei moris sente duni independénsia ida-ne’e nia furak durante tinan-25 ona.

Ami sira ne’ebé sei moris ne’e agradese loos. Tanba maluk barak labele moris hanesan ami. Ami bé hahí nafatin maluk sira ne’ebé mate ona. Imi-nia mate mak ohin loron ami goza independénsia ida-ne’e.

Relatóriu CAVR

Entretantu, tuir Relatóriu CAVR, 06 abríl tinan 1999, maizumenus ema neen-nulu (60) to’o atus-ida (100) husi populasaun sívil sira ne’ebé refujia iha igreja São João de Brito mak hetan oho husi milísia Besih Merah Putih (BMP) hamutuk ho Militár Indonézia husi KODIM 1638 Liquiça, Koramil Maubara, Membru KOPASSUS Satgas Tribuana VIII, Membru Batallaun 143 no membru BRIMOB husi Dili ne’ebé uza hotu máskara (topeng) taka sira-nia oin, halo atake ba igreja ne’e. Númeru ema ne’ebé mate ne’e seidauk serteza no to’o agora seidauk identifika fatin ne’ebé ema hirak ne’e hakoi ba.

Masakre Igreja São João de Brito hetan instrusaun husi, Bupati Leonito Martins, no Komandante BMP, Manuel Sousa no iha igreja oin Sarjentu Tome Diogo mak fó orden ba milísia sira hodi tiru.

Rekomendasaun ba Estadu

Husu ba Estadu atu dignifika vítima sira-nia sakrifísiu iha Masakre Liquiça. Durante ne’e ami-nia maluk sobrevivente balun sente ona rekoñesimentu husi Estadu, maibé balun seidauk sente. Governu se bele tau netik osan ruma atu dignifika sobrevivente sira ne’ebé uluk terus liuliu Masakre Liquiça.

Sira barak la hetan subsídiu hanesan veteranu, maibé iha alternativu seluk ba Governu atu rezolve sira ka la’e? Liliu ba sira ne’ebé hetan taa, oho, violasaun seksuál, balun hetan baku to’o agrava labele halo serbisu ba moris, oinsá Governu tau atensaun ba sira? Fizikamente sira labele halo uma, oinsá Governu haree ba ida-ne’e, ami husu ba Sentru Nasionál Chega! (CNC, sigla portugés), se bele konstroi netik uma balun ba sobrevivente sira. 

Vítima sira lakon to’o ohin loron. Ba maluk sira ne’ebé lakon to’o ohin loron oinsá Governu haree hodi halo netik monumentu ida ba sira. Iha Governu da-ualu ami lansa ona oinsá atu harii monumentu ba maluk sira ne’ebé lakon iha igreja Liquiça, maibé to’o agora seidauk realiza. Ami husu ba Governu ida-ne’e, se bele tau orsamentu balun atu harii monumentu ka halo jardin ida ba sira ne’ebé mak lakon to’o ohin loron la hatene sira-nia paradeiru.

Kontribuisaun ba dezenvolvimentu nasionál

Hanesan sobrevivente ida, ami hatudu ezemplu di’ak ba jerasaun sira tuirmai ne’e. Uluk ami kontribui ba manán ita-nia independénsia agora ami hamriik firme nafatin kontribui ba ita-nia dezenvolvimentu.

Ami sei la hanoin aat ba maluk sira ne’ebé uluk halo aat mai ami, tanba ita halo ona rekonsiliasaun. Ami sente katak nasaun ida-ne’e presiza ema hotu nia hamutuk. La presiza haree ona ba pasadu. Bainhira ita odiu malu, haree bebeik ba kotuk mak ita nunka atu hakat ba oin, Konflitu para ona iha tinan-1999. (Tinan)-2000 mai leten to’o agora ita hamutuk dezenvolve ita-nia nasaun.

Nune’e, husu ba joven sira atu labele kria konflitu iha nasaun lulik ida ne’e, tanba nasaun ne’e sosa ho ruin no ran. Agora mai ita hamutuk fó liman ba malu hodi hateke ba oin, ba futuru Timor-Leste ida-ne’ebé nabilan ba ita no ba ita-nia beioan sira.

 

Jornalista   : Hortêncio Sanches

Editór           : Rafael Ximenes de A. Belo

iklan
iklan

Leave a Reply

iklan
error: Content is protected !!