Komunidade Abafala seidauk asesu bee-moos
BAUCAU, 09 abríl 2024 (TATOLI) – Komunidade iha suku Abafala, postu administrativu Quelicai, munísipiu Baucau, seidauk asesu bee-moos.
Xefi suku Abafala, Agapito dos Reis, hateten hosi aldeia haat ne’ebé eziste iha suku referidu komunidade hosi aldeia rua hanesan Asaluki ho Tela’a mak to’o agora susar asesu bee-moos no obrigadu tenke sosa bee tanki no konsume udan-been hodi sustenta ba nesesidade lorloron nian.
“Ami iha ona liuhosi orsamentu PNDS nian, liuliu atu utiliza sosa bomba hodi kanaliza bee ba komunidade,” Xefe suku Abafala iha Vila nova, tersa ne’e.
Alende aldeia rua, aldeia rua seluk mos nafatin asesu bee-moos ho distánsia dook tanba tenke kuru iha bee-matan nune’e parte autoridade suku sei rezolve liuhosi programa regulár PNDS iha tinan ne’e.
Autoridade Abafala rasik deside prevee orsamentu hamutuk rihun $65 kompostu orsamentu tinan-2021 hamutuk rihun $26 no rihun$39 iha tinan-2024 hodi solusiona problema bee-mos ne’ebè komunidade enfrenta.
“Bee-matan hosi área Mumana nian ho distánsia kilómetru 1 resin, ita sei kanaliza ba aldeia Asaluki no Tela’a,” Agapito dos Reis akresenta.
Komunidade Aldeia Asaluki, Francisco Ximenes, hateten, aldeia referedu tinan barak ona seidauk asesu bee-moos nune’e maioria deside sosa bee tanki ho orsamentu $50 kada semana.
“Ami komunidade aldeia Asaluki la hetan bee-moos, tempu udan ami konsumu bee-udan no bailoro ami tenke sosa bee tanki,” Francisco Ximenes hateten.
Nia husi atu governu solusiona preokupasaun iha aldeia Asaluki kona-ba bee-moos tanba konsidera bee-moos sai nesesidade dahuluk iha komunidade liuliu área rurál.
Suku Abafala hamutuk aldeia haat kompostu Asaluki, Karanuu, Mumana no Tela’a ho totál populasaun 2.200 hosi totál xefe família 600-resin.
Jornalista : Natalino Belo
Editór : Evaristo Soares Martins
