KSMMP ezonera José Ximenes hosi funsaun Prokuradór

DILI, 10 abríl 2024 (TATOLI) – Prokuradór Jerál Repúblika (PGR), Alfonso Lopez, dehan Konsellu Superiór Majistratura Ministériu Públiku (KSMMP) deside hodi ezonera José Ximenes hosi Prokuradór.
“Ita-nia eis-Prokuradór Jerál Repúblika José Ximenes iha fulan rua kotuk ba hatama pedidu ida mai Prokuradór Jerál Repúblika no hosi pedidu ne’e nia konteúdu deskreve katak ita-nia eis-Prokuradór Jerál Repúblika ne’e nia rasik ho vontande husu hodi ezonera nia hosi funsaun hanesan Prokuradór. Entaun pedidu ne’e lori ba halo diliberasaun iha Konsellu Superiór Majistratura Ministériu Públiku no Konsellu deside hodi aprova pedidu ne’e, nune’e Konsellu ezonera nia hosi kargu hanesan Prokuradór”, Alfonso Lopez hateten ba jornalista sira iha Kampung Alor, kuarta, ohin.
Nia esplika, ezonerasaun ida-ne’e akontese liuhosi desizaun no aprovasaun hosi Konsellu. Prosedimentu mak la’o nune’e, se Prokuradór submete pedidu, Prokuradoria Jerál Repúblika tenke lori ba Konsellu.
“Desizaun ne’e tenke liuhosi diliberasaun iha Konsellu no Konsellu mak halo aprovasaun”, nia afirma.
Alfonso Lopez hateten, ho desizaun ne’ebé mak antigu PGR José Ximenes foti, Ministériu Públiku sente triste tanba sente falta tán rekursu di’ak ida iha instituisaun Ministériu Públiku.
“Ba desizaun ida-ne’e, ita sente triste, tanba Ministériu Públiku falta tán rekursu ida ne’ebé di’ak, maibé ida-ne’e mak desizaun no desizaun ida-ne’e nia rasik mak foti”, nia konklui.
Jornalista: Natalino Costa
Editór : Zezito Silva

